Qazaqstandyq stsenarıst Halyqaralyq kınofestıvalde jeńimpaz atandy
LONDON. QazAqparat - Ulybrıtanııada Eýrazııalyq Shyǵarmashylyq Gıldııa kınofestıvalinde qazaqstandyq avtor Záýre Tórehanovanyń «Jibek qurtynyń uıasy» shyǵarmasy «Úzdik stsenarıı» atalymy boıynsha úzdik dep tanyldy. Onyń eńbegin qazylar alqasy fentezı janryndaǵy biregeı týyndy retinde baǵalaǵan, dep habarlaıdy QazAqparat tilshisi.
Záýre Tórehanova – balalar jazýshysy, stsenarıst. Banktegi qyzmetin tastap, shyǵarmashylyqpen aınalysqanyna kóp ýaqyt bola qoımaǵan.
Sonyń ózinde birneshe qazaqstandyq ádebı baıqaýlar men syılyqtardyń laýreaty atanyp úlgerdi. Endi mine Záýre halyqaralyq deńgeıde tanylyp otyr. Pandemııanyń kesirinen ol, ókinishke qaraı, marapattaý rásimine qatysa almady. Qazylar alqasy músheleriniń aıtýynsha, oqıǵa órbigen stsenarıı sıýjetinde syıqyrly álem keıipkerleriniń obrazdary ǵajap sýrettelgen.
«Stsenarıı - biregeıligimen tań qaldyrady. Ol óte jan-jaqty jazylǵan.
Óte keremet. Ekinshiden, shyǵarma fentezı janrynda búge-shúgesin qaldyrmaı, jan-jaqty sýrettelýimen erekshelenedi. Mundaıdy sırek kezdestiresiń», deıdi qazylar alqasynyń múshesi Spenser Hoýken.
Qazaqstandyq rejısserler men stsenarısterdiń taǵy 3 eńbegi festıvaldiń fınalısi atandy.
Aıta ketý kerek, Eýrazııalyq Shyǵarmashylyq Gıldııa kınofestıvali - Eýrazııalyq kınematografııanyń aǵylshyn tildi keńistikte taralýyna sebepshi bolyp júrgen az sharalardyń biri. Ol brıtanııalyq
bedeldi Romford Film Festival kınofestıvalimen yntymaqtastyqta ótkizilip keledi. Bıyl pandemııaǵa qaramastan uıymdastyrýshylar sharany onlaın emes dástúrli formatta ótkizip otyr. London kınoteatrynda 200-den astam jumys aǵylshyn tilinde derekti, kórkem, qysqametrajdy kıno, anımatsııalyq fılm jáne basqa da janrlarda kórsetildi. Qazaqstannan bólek, baıqaýǵa Belarýs, Italııa, Reseı, Ulybrıtanııa, Izraıl, Katar, Grýzııa, Kanada jáne Fınlıandııa elderiniń ókilderi qatysty.
