Qazaqstandyq saılaýshylar Belgııada daýys bere bastady

BRıÝSSELЬ. QazAqparat – Brıýsselde QR Konstıtýtsııasyna ózgerister men tolyqtyrýlar engizý jónindegi referendým kúni Qazaqstannyń Belgııa Koroldigindegi Elshiligi janynda uıymdastyrylǵan №241 daýys berý ýchaskesi jumysyn bastady, dep habarlaıdy QazAqparat menshikti tilshisi.

Saılaý ýchaskesi Brıýssel ýaqytymen tańǵy saǵat 7-de ashyldy. Daýys berý saılaý zańnamasynda belgilengen tártippen bastaldy. Belgııa men Lıýksembýrgte turaqty turatyn nemese osy elderde ýaqytsha júrgen qazaqstandyqtar daýys berý úshin myna mekenjaıǵa kele alady: Brıýssel qalasy, Ýkkel kommýnasy, Van Bever avenıý, 30-úı.

Brıýssel saılaý ýchaskesi 200 qazaqstandyq saılaýshyny qabyldaýdy josparlap otyr. Olardyń arasynda qazaqstandyq dıplomattar men olardyń otbasy músheleri, eýropalyq ınstıtýttar janynda tirkelgen jýrnalıster, shyǵarmashylyq ıntellıgentsııa, ǵylymı qoǵamdastyq, bıznes jáne stýdent jastar ókilderi.

Saılaý týraly zańnamaǵa sáıkes, Brıýsselde daýys berý Ortalyq Eýropa ýaqytymen 20:00-ge deıin ótedi.