Qazaqstandyq saıahatshylar men demalýshylar jańadan ashylatyn áýe reısi arqyly Ystyqkólge aptasyna eki ret usha alatyn bolady
ALMATY. 4 shilde. QazAqparat /Názıra Eleýhan/ - ıÝSAID-tiń qoldaýymen alǵash ret «Almaty-Tamchy» tikeleı áýe reısi ashylady. Bul týraly búgin Almatyda ótken arnaıy baspasóz máslıhatynda habarlandy.
«Áýe reısi aptasyna eki ret, dúısenbi jáne beısenbi kúnderi qatynaıtyn bolady. Barlyq týrıstik maýsym barysynda biz osy baǵdarlamany ustanýǵa tyrysamyz. Reısti «Skat» áýe kompanııasy 46 oryndyq «AN-24» ushaqtary arqyly oryndaıtyn bolady. Bul áýe reısi Qazaqstan men ózge de alys-jaqyn sheteldik týrısterdiń Ystyqkólde alańsyz demalýy úshin jasalynyp otyr»,-dedi «Kompas-Qazaqstan» agenttiginiń atqarýshy dırektory Inna Dorash.
«Biz osydan bir saǵat buryn osy reıspen Tamchydan Almatyǵa keldik. Reıs te, ushaq ta óte yńǵaıly», - dedi «Mýza: týrızm jáne saıahat» týrısttik agenttiginiń dırektory Mıráli Muhamedıev. Onyń aıtýynsha, ıÝSAID jobanyń marketıngtik bóligin qarjylandyrǵan. «Qalǵan shyǵyndardy bizdiń jáne «Kompas-Qazaqstan» agenttigi qolǵa aldy. Bortty biz jalǵa aldyq, arnaıy kesteni jasap, týrpaketterdi, qonaq úıler men tamaqtaný jaǵyn usynatyn bolamyz. Baryp, qaıtýǵa bılettiń quny - 33 myń teńge. Jazǵy maýsymnyń sońyna deıin biz 18 reısti júzege asyrýdy josparlap otyrmyz», - dedi ol.
«Báıterek» týrıstik agenttiginiń ókili Raýshan Sartaevanyń aıtýynsha, ushý uzaqtyǵy - bir saǵat. «Týrıster úshin eń basty faktor - ýaqyttyń únemdiligi. Osy jylǵy jazǵy maýsymnyń birinshi aıy Ystyqkólge kelýshiler sanynyń artqandyǵyn kórsetip otyr. Búginde týrıster úshin úlken másele - shekarada úsh-tórt saǵattaı turyp qalý bolyp otyr. Sondyqtan, qazirdiń ózinde bizge tamyz aıyna ótinishter jaqsy kelip túsýde», - dep atap ótti ol.
