Qazaqstandyq sarbazdar halyqaralyq baıqaýǵa daıyndalyp jatyr

ASTANA. QazAqparat - Qaraǵandyda «Sývorov tegeýrini» halyqaralyq baıqaýyna qatysý úshin áskerı qyzmetshilerdi irikteý bastaldy, dep habarlaıdy QR Qorǵanys mınıstrliginiń baspasóz qyzmeti.

«Spassk» oqý-jattyǵý ortalyǵynyń bazasynda Qaraǵandy garnızonynyń áskerı qyzmetshileri jaıaý ásker jáne jaýyngerlik mashına (JÁJM-2) ekıpajdary quramynda Halyqaralyq armııa oıyndarynyń «Sývorov tegeýrini» baıqaýynda Qazaqstan Qarýly Kúshteriniń namysyn qorǵaý úshin baq synaýda.

Baıqaý qatysýshylaryna 2 kezeńnen ótý kerek. Eń aldymen, 3 adamnyń ekıpaj quramyndaǵy jeke jarysy, tankige qarsy granataatqysh túrinde nysana arqyly qosarly oqshashardan, JÁJM men tikushaqtan, avtomatty zeńbirekten oq atýdy oryndaı otyryp, 3-5 km úsh sheńberdi aınalady. 2-kezeńde estafeta ótedi.

Baıqaý sharttaryna sáıkes ekıpaj qashyqtyǵy 3-5 km quraıtyn 4 sheńberdi aınalady. Onda olarǵa qorshaýlar men manevrleý ýchaskesi túrindegi kedergilerden, atys jolaǵynan, tankige qarsy ordan, kópirden ótýge týra keledi.

Odan basqa, birneshe atys shepterinde JÁJM-niń ekıpajyna jaıaý áskerdiń urys mashınasy, tankige qarsy granataatqysh, tikushaq, tankige qarsy zeńbirek, jerústi qondyrǵy túrindegi nysanalarǵa dóp tıgizý qajet. Joǵary nátıjeler kórsetken áskerı qyzmetshiler 2019 jylǵy Armııa halyqaralyq oıyndarynda QR Qarýly Kúshteriniń qurama komandasy quramynda saıysqa túsetin bolady.