Qazaqstandyq sarbazdar gir sportynan álem birinshiliginde alty altyn medal oljalady

ASTANA. QazAqparat - Úndistannyń Nıý-Delıinde gir sportynan ótip jatqan álem chempıonatynyń sońǵy eki kúninde qazaqstandyq áskerı qyzmetshiler ulttyq quramanyń qorjynyn taǵy 6 altyn jáne 1 qola júldemen tolyqtyrdy.

Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Áýe qorǵanysy kúshteriniń eki áskerı qyzmetshisi jeńis tuǵyrynan kórindi. Maıor Ádilhan Nurǵazın 85 keliden joǵary salmaqta julqı, serpe kóterýden jáne komandalyq estafetada 3 «altyn», sondaı-aq uzaq tsıkl boıynsha gir kóterýde qola medal jeńip aldy.

Merzimdi qyzmettegi sarbaz qatardaǵy jaýynger Erbol Daıyrbaı 95 keliden joǵary salmaqta gir tasyn julqı jáne serpe kóterýden eki altyn medal enshiledi.

95 keliden joǵary salmaq dárejesinde taǵy bir joǵary marapat «Shyǵys» óńirlik qolbasshylyǵynyń áskerı qyzmetshisi 3-synypty serjant Suńqar Qýanyshqa buıyrdy.

Buǵan deıin álem birinshiliginiń alǵashqy tórt jarys kúninde Qorǵanys mınıstrligi Ortalyq sport klýbynyń ókilderi úzdikter sapynan kórinip, 6 altyn, 2 kúmis jáne 1 qola medal alǵany aıtylǵan bolatyn.