Qazaqstandyq sarbazdar «Dostastyq jaýyngeri» baıqaýynda sýyrylyp alǵa shyqty (FOTO)
Bul týraly QR Qorǵanysy mınıstrliginiń baspasóz qyzmeti habarlady.
Qazaqstan, Armenııa, Belarýs, Qyrǵyzstan, Reseı Federatsııasy jáne Tájikstan áskerı qyzmetshileri úsh baıqaý boıynsha jarysty. Atap aıtsaq, «Atlet» saıysy - 100 metrge júgirý, er azamattar belaǵashta biriktirilgen kúshtik jattyǵýlardy, al qyzdar kúshtik jattyǵýlar jıyntyǵyn oryndaý. «Mergen» jarysy - AK-74 tekserý jáne qalypty urys kúıine keltirý, baqylaý atys jattyǵýy jáne áskerı-sporttyq atys. «Kásipqoı» saıysy - Kedergi jolaǵyn ıgerý, jalpy áskerı qorǵanys keshenin kııý, sýyq qarý laqtyrý jáne nysanany dáldeý.
Eki jarys kúniniń qorytyndysy boıynsha QR Qarýly Kúshteriniń áskerı qyzmetshilerinen quralǵan top alda keledi. Ekinshi kúni qazaqstandyq áskerı qyzmetshi er-azamattar arasynda basym túsip: 1 oryndy - 97616 áskerı bóliminiń vzvod serjanty, serjant Orynbek Sandybekov (153,1) jeńip alsa, ekinshi oryndy 68665 áskerı bóliminiń serjanty, aǵa serjant Rýstem Sátjanov (152,7), úshinshi oryndy 03811 áskerı bóliminiń top serjanty, aǵa serjant Ámirjan Maýshev (145,0) enshiledi. Áskerı qyzmetshi qyz-kelinshekter arasynda 20-dan astam upaı sanymen QR QK ókilderi alda keledi, atap aıtsaq, 85510 áskerı bóliminiń ekspedıtory, kishi serjant Lıýdmıla Gýbareva (147,7) ekinshi orynda - Belarýs Respýblıkasynyń áskerı qyzmetshisi 97020 áskerı bóliminiń dalalyq baılanys toraby jáne ABQ aǵa radıotelegrafısi, efreıtor Anna Kovalevskaıa (124,3) úshinshi oryndy - Reseı Federatsııasynyń 22277 áskerı bóliminiń baılanys vzvody, radıostansanyń radıotelegrafısi Elena Lýtkova (108,8) ıelendi.
Jalpy komandalyq esep boıynsha birinshi oryn - 598,5 upaımen Qazaqstan Qarýly Kúshteriniń áskerı qyzmetshileriniń, ekinshi oryn 496,8 upaı sanymen Belarýs Respýblıkasynyń, al úshinshi oryn 491,3 upaı jınaǵan Reseı Federatsııasynyń enshisinde. Budan keıingi oryndarǵa Qyrǵyzstan (418,3), Armenııa (377,5) jáne Tájikstan (179,6) Respýblıkalary ıelendi.
19 tamyz kúni sońǵy «Atlet» - 1 000 jáne 3 000 metrge júgirý jáne «Kavaler/Sýdarynıa» (Qyz/jigit) ádebı-shyǵarmashylyq jarystary ótse, 20 tamyz kúni Astana qalasynyń Beıbitshilik pen kelisim saraıynda baıqaý jeńimpazdaryn saltanatty marapataý rásimi men qazaqstandyq estrada juldyzdarynyń qatysýymen gala-kontsert bolady.