Qazaqstandyq sarbaz sý astyndaǵy baǵdarlaý boıynsha Eýropa kýbogy kezeńin jeńip aldy

ASTANA. QazAqparat - Qarýly kúshterdiń sarbazy sý astyndaǵy baǵdarlaý boıynsha Eýropa kýbogy kezeńiniń jeńimpazy atandy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Halyqaralyq jarystar Germanııanyń Zandersdorof qalasynda ótti. Oǵan 5 elden 65 sportshy qatysty.

Sý astyndaǵy baǵdarlaýda karta boıynsha armııa sportshysy Shahnoza Qurbanova altyn medaldy jeńip aldy. Tórt júzýshiniń qatysýymen 200 metrlik estafetada ol kúmiske ıe boldy.

Eýropa kýbogynyń sońǵy kezeńi 9-11 maýsym aralyǵynda Chehııada ótedi.

– Bul sý astyndaǵy baǵdarlaý boıynsha maýsymdaǵy alǵashqy jarys. Meniń oqýshylarym óz múmkindikterin tolyq kórsetti dep sanaımyn, – dedi sý astynda júzýden Qazaqstan Respýblıkasynyń eńbek sińirgen jattyqtyrýshysy Valerıı Vasılev.

Aıta ketý kerek, bul armııa sportshysynyń alǵashqy jeńisi emes.

Basketboldan sport sheberine kandıdat, sý astynda júzýden halyqaralyq dárejedegi sport sheberi Shahnoza Qurbanova 2012 jylǵy sý astynda baǵdarlaýdan Eýropa chempıonatynyń kúmis júldegeri (Ispanııa), 2013 jylǵy álem chempıonatynyń qola júldegeri (Reseı), 2015 jylǵy álem chempıonatynyń kúmis júldegeri (Chehııa).