Qazaqstandyq sapanyń jańa belgisi beriledi
Uıym basshysy Azat Ábdirahmanovtyń aıtýynsha, jańa belgige Eýropanyń sapa uıymy jáne Qytaıdyń sapa qaýymdastyǵy kepildik berip otyr. «Demek, atalǵan uıymdar bizdiń bergen dıplomymyzdy moıyndaıdy. Osylaısha, otandyq taýarlar men qyzmetterdi halyqaralyq dárejede tanymal etýge múmkindik bar. Sebebi taýardyń qaptamasynda «Qazaqstandyq sapa belgisi» degen jazýmen birge sol uıymdardyń ataýlary da kórsetiledi. «Atameken» ulttyq kásipkerler palatasy da qoldap jatyr. Endi, biz kásipkerlerdi jańa belgini alýǵa mindetteı almaımyz. Ol - árbir bıznesmenniń óz erki. Otandyq kásiporyndar jańa belgini alamyn dese, biz daıynbyz. Ótinim berilse, jeńil aýdıt ótkizemiz. Al taýardyń sapasyna kóz jetkizgennen keıin kýálikti bere alamyz. Bizdiń mamandarymyz daıyn, sapa talaptary da ázirlendi. Aýdıt ótkizýdiń tártibi bekitilgen», - dedi A.Ábdirahmanov QazAqparat tilshisine bergen suhbatynda.
Mamannyń sózine qaraǵanda, sapaǵa qatysty san alýan dıplomdarǵa sene berýge bolmaıdy. Sebebi ondaı qujattar sapanyń kórsetkishi emes. «Mysaly, satyp alatyn dıplomdar men kýálikter bolady. Ondaıda óz ónimińizdi aparasyz da, sonyń ústine 1000 dollar tóleseńiz, sizge ádemi ramkamen kýálik bere salady. Al ulttyq konkýrsqa, ıa bolmasa, halyqaralyq baıqaýǵa, máselen Eýropanyń sapa konkýrsy bar, Azııa sapa konkýrsy bar, sol jerden jeńip shyqsańyz, onda bolady. Áıtpese, bireýler uıymdastyratyn tolyp jatqan reıtıngter bar. Negizi, reıtıngter de satyp alynady. Sonyń dıplomdaryn toltyryp qoısa, ol ónimniń kórsetkishi emes. Resmı medaldar, resmı konkýrstardyń kýálikteri bolýy qajet», - dep atap kórsetti A.Ábdirahmanov.
