Qazaqstandyq samboshy QR Prezıdenti júldesi úshin jarystyń jeńimpazy atandy
ASTANA. QazAqparat - Astanada QR Prezıdentiniń júldesi úshin sambodan erler, áıelder arasynda halyqaralyq týrnırdiń alǵashqy kúniniń jeńimpaz-júldegerleri belgili boldy, dep habarlaıdy QazAqparat tilshisi.
Halyqaralyq sambo federatsııasynyń saıtynan alynǵan málimetke qaraǵanda, qazaqstandyq palýan Ábdihamıt Ábdirazaqov 52 kg salmaqta chempıon atandy.
Sondaı-aq 62 kg salmaqta fınalda reseılik Mıhaıl Dııanovqa jol bergen Asyljan Ǵaısaev kúmis júldege ıe boldy. 100 keliden joǵary salmaqta Oljas Shynkeev kúmis, Ermek Itqusov pen Ertýǵan Baqytkeldi qola júldeni enshiledi. Erkebulan Qalesh 90 kg salmaqta úshinshi orynǵa kóterildi.
Áıelder arasynda Aıjan Jylqybaeva 48 kg, Aqqal Ótebek pen Gúlderaıym Álmaǵambet 64 kg, Nurǵanym Turshabek 80 keliden joǵary salmaqta qola júldeger atandy.
Áskerı sambodan 52 kg salmaqta Erkebulan Qýanǵalıev kúmis júldege qol jetkizse, Nurken Dombaev pen Ánýar Káribaev úshinshi orynǵa ilikti.
Sonymen qatar Abzal Ábildashev 62 kg, Raýan Manasov 74 kg, Amanjol Saıtenov 100 keliden joǵary salmaqta ekinshi orynnan kórindi.
Nurbol Qurban men Qýanysh Aıazbaev 90 kg salmaqta úshinshi orynǵa taban tiredi.
90 kg salmaqta kúresken batysqazaqstandyq Erkebulan Qaleshtiń bapkeri Talǵat Balmaǵambetovtiń aıtýynsha, shákirti reseılik sportshyǵa ese jibergenimen, sodan keıin tájik, ózbek palýandaryn aıqyn basymdylyqpen utty. Erkebulannyń salmaǵy negizi 82 kg bolǵanymen, 90 keli salmaqta jaqsy kúresip, júldege ilikti.
Aıta keteıik, álem kýbogy kezeńi bolyp esepteletin halyqaralyq jarys 1 shilde kúni márege jetedi.
Batys Qazaqstan oblysynan 57 kg salmaqta kilemge Syrym Meıirmanov pen Bolatbek Raıymqulov shyǵady.
