Qazaqstandyq samboshy «Harlampıev memorıaly» týrnırinde jeńimpaz atandy
NUR-ASTANA. QazAqparat - Qazaqstandyq palýandar Máskeýde sambodan ótken «Harlampıev memorıaly» álem kýbogy jarysynda bir altyn, bir kúmis, tórt qola medaldy jeńip aldy, dep habarlaıdy QazAqparat tilshisi.
Halyqaralyq sambo federatsııasy habarlaǵanyndaı, eki kúnge sozylǵan aıtýly dodada erler men áıelder arasynda jáne áskerı sambodan 27 salmaq dárejesi boıynsha jeńimpaz-júldegerler anyqtaldy.
Qazaqstan quramasynan 52 kg salmaqta synǵa túsken 2018 jylǵy Azııa oıyndarynyń jeńimpazy Baǵlan Ibragım qarsylastarynyń bárinen basym túsip, chempıon atandy. Ol fınalda reseılik samboshy Alekseı Klıýkındi jeńdi.
Áıelder arasynda 68 kg salmaqta belgili samboshy Dildásh Kúrishbaeva sońǵy básekege deıin alqynbaı jetti. Áıtse de ol fınalda mońǵolııalyq sportshyǵa ese jiberip, kúmis júldeni qanaǵat tutty.
Taǵy bir qazaqstandyq Aınur Aqjigitova 72 kg salmaqta júldeli úshinshi orynnan kórindi.
Sondaı-aq Qaıyrberdi Aıdynbaı (57 kg), Parasat Jumabaev (62 kg) qola medalǵa ıe boldy.
Áskerı sambodan Temirlan Orazov qana júldege ilikti. Ol 57 kg salmaqta qola júldeger atandy.
«Harlampıev týrnıri» - bıyl Koreıa astanasy Seýlde ótetin álem chempıonaty aldyndaǵy mańyzdy jarystardyń biri.
Eske sala keteıik, ótken jyly osy týrnırde qazaqstandyq samboshylardyń 8 júlde alǵanyn jazǵan bolatynbyz.
