Qazaqstandyq samboshy Erbolat Baıbatyrov álem chempıonatynyń kúmis júldegeri atandy
ORAL. QazAqparat - Bolgarııa astanasy Sofııa qalasynda sambodan ótip jatqan álem chempıonatynda batysqazaqstandyq palýan Erbolat Baıbatyrov kúmis júldeger atandy, dep habarlaıdy QazAqparat.
«Qazsport» telearnasynan tikeleı efırde kórsetkenindeı, Erbolat 57 kg salmaqta fınalda grýzııalyq samboshy Vahtang Chıdrashvılımen kilemge shyqty. Erbolat Baıbatyrov osyǵan deıin tórt márte álem chempıony atansa, qarsylasy mundaı jeńis tuǵyryna úsh dúrkin kóterilgen edi. Bir-birin jaqsy biletindikten, báseke tartysty ótti. Eki upaıǵa ádis jasaǵannan keıin grýzın palýany Erbolattyń qolyn baılap, kúrespeı júrip aldy. Tóreshi oǵan eskertý berip, qazaqstandyq palýannyń enshisine bir upaı jazylǵanymen, bul jeńis úshin jetkiliksiz edi. Sóıtip V.Chıdrashvılı 2:1 esebimen utyp, ol da Erbolat sııaqty álemniń tórt dúrkin chempıony atandy.
Degenmen sońǵy jyldary álem birinshiliginiń júldesi buıyrmaı júrgen otyz jastaǵy Erbolat Baıbatyrov úshin kúmis medaldiń ózi úlken jetistik deýge bolady. Onyń fınalǵa barar joly ońaı bolǵan joq. Alǵashqy beldesýinde álem chempıonattarynda júlde alyp júrgen reseılik Aımergen Atkýnovty, sodan keıin tájik palýanyn tize búktirgen Erbolat keshe bastalǵan osy dodada Qazaqstan qorjynyna alǵashqy medaldi saldy. Taǵy eki batysqazaqstandyq palýan Qazbek Supyǵalıev pen Temirlan Ihsanǵalıev áskerı sambodan 62 jáne 82 kg salmaqta qola júldeni ıelendi.
Aıta keteıik, Qazaqstannyń eńbek sińirgen jattyqtyrýshysy Raıymbek Meńdiǵalıev baptaıtyn polıtsııa aǵa leıtenanty Erbolat Baıbatyrov BQO ishki ister departamentinde qyzmet etedi. Ol bıyl Kstovo (Reseı) men Tbılısı qalasynda ótken halyqaralyq týrnırlerde kúmis júldeger atanyp, álemdik dodaǵa joldama alǵan edi. Tbılısıde fınalda dál osy V.Chıdrashvılıge ese jibergen bolatyn.
