Qazaqstandyq samboshy álem chempıony atandy
ASTANA. QazAqparat - Qazaqstandyq samboshy Nurbol Serikov Rýmynııa astanasy Býhareste erler men áıelder arasynda ótip jatqan álem chempıonatynyń jeńimpazy atandy, dep habarlaıdy QazAqparat tilshisi.
Dúnıejúzilik dodanyń alǵashqy kúni qarsylas shydatpaǵan Nurbol 68 kg salmaqta fınalda Ázerbaıjan eliniń ókili Emıl Gasanovpen kilemge shyqty.
Asa tartysty beldesý 1:1 esebimen teń aıaqtaldy. Degenmen sońǵy upaıdy qazaqstandyq palýan alǵandyqtan, jeńis Nurbolǵa berildi.
Taǵy bir qazaqstandyq Serikjan Túsipov áskerı sambodan 57 kg salmaqta qola júldege ıe boldy. 
BQO dene shynyqtyrý jáne sport basqarmasynan alynǵan málimetke qaraǵanda, 25 jastaǵy Nurbol Serikov 1993 jyly Qaztalov aýdany Aqpáter aýylynda dúnıege kelgen. Alǵashqy bapkeri - Jeńis Stamǵazıev. Oral qalasyndaǵy sportqa daryndy balalarǵa arnalǵan mamandandyrylǵan oblystyq mektep-ınternatynyń túlegi N.Serikov qazirgi kezde Qazaqstannyń eńbek sińirgen jattyqtyrýshysy Raıbek Meńdiǵalıevtiń qol astynda daıyndalyp júr.
Aıta keteıik, Býharestegi álem chempıonatynda Qazaqstan quramasy sapynda BQO-dan Temirlan Kólbaı (+100 kg), sondaı-aq áskerı sambodan Qazbek Supyǵalıev (62 kg) pen Temirlan Ihsanǵalıev (82 kg) kilemge shyǵady.
Álem birinshiligi 11 qarasha kúni márege jetedi.
Aıta keteıik, aldaǵy aptada sambo kúresiniń shyqqanyna týra 80 jyl tolǵaly otyr.
