Qazaqstandyq samboshy álem chempıonatynyń kúmis júldegeri atandy
QYZYLORDA. QazAqparat - Qyzylordaly balýan Ernar Qýandyq Serbııanyń Novı-Sad qalasynda jaóspirimder arasynda ótken sambodan álem chempıonatynda kúmis júldeger atandy, dep habarlaıdy QazAqparat tilshisi.
Syr sportshysy álem chempıonatynda tórt beldesýge shyqty. Onyń úsheýinde qarsylastaryn aıqyn basymdyqpen qapy qaldyrdy. Aldymen ýkraın balýan jeńse, odan keıin moldovan jáne armıan sportshylarynan basym tústi. Fınalda Reseı balýanyna ese jiberip qoıdy.
Álem chempıonatyna dúnıe júziniń 28 elinen balýandar keldi. Bizdiń elimizdiń quramasy 1 altyn, 3 qola medal alyp qaıtty.
«Alǵa qoıǵan maqsatym kóp. Solardyń biri - jastar arasyndaǵy álem chempıonatynda baq synaý. Atalmysh jarysta jeńimpaz qatarynan kórinýge kúsh salsam deımin», - dedi Ernar Qýandyq.
Ernar sambomen birge dzıýdo jáne qazaq kúresinen baq synap keledi. Ol sambo men qazaq kúresinen el chempıony atanyp úlgerdi. Al dzıýdoan eki márte altynnan alqa taqty.
Ony jarysqa Maqsat Ospanov pen Darhan Serjanov daıyndady.
Budan buryn qyzylordalyq grek-rım kúresiniń sheberi Aıdos Sultanǵalıdyń Majarstanda ótken álem birinshiliginde júldeger atanǵanyn habarlaǵan edik. Sondaı-aq, ol QazAqparat tilshisine bergen suhbatynda 2020 jylǵy Olımpıadada el namysyn qorǵaýdy maqsat etetinin aıtqan edi.
