Qazaqstandyq Samal Eslıamova Kann kınofestıvalinde úzdik aktrısa atandy
ALMATY. QazAqparat - Qazaqstandyq aktrısa Samal Eslıamova 71 Kann kınofestıvalinde óz atalymy boıynsha úzdik dep tanyldy, dep habarlaıdy QazAqparat tilshisi kınofestıvaldiń Twitter áleýmettik jelisindegi paraqshasyna siltememen.
Samal Eslıamova reseıik rejısser Sergeı Dvortsevoıdyń «Aıka» atty kartınasynda basty róldi somdaǵan.
Aktrısa rejısser Sergeı Dvortsevoıǵa óz alǵysyn aıtty.
C. Eslıamova 1984 jyly 1 qyrkúıekte týǵan. 2011 jyly Reseıdiń teatr óneri ýnıversıtetin (GITIS) bitirgen.
Buǵan deıin ol «Tıýlpan» fılminde basty róldi somdaǵan. Bul týyndy 2008 jyly Kannda «Erekshe kózqaras» konkýrsynyń bas júldesin, jas ádilqazylardyń júldesin, Frantsııanyń bilim mınıstrliginiń júldesin jeńip alǵan bolatyn.
