Qazaqstandyq sadaqshylar əlem kýbogynyń kúmis medalin enshiledi
Bul jóninde Almaty oblystyq sport jáne dene shynyqtyrý basqarmasynyń basshysy Turatbek Charapıev óziniń Feısbýktegi paraqshasynda málim etti.
"Sadaq atý sporty boıynsha Túrkııanyń Antalııa qalasynda álem kýbogynyń ekinshi kezeńi máresine jetti.Qazaqstandyq mergender eki kezeń qatarynan aqtyq synǵa deıin jetip otyr. Oıbek Saıdıev, Denıs Gankın jáne Sultan Túzelbaevtan quralǵan qazaqstandyq sadaqshylar alǵashqy aınalymda qytaılyq Taıpeıden 6:2 esebimen basym tústi. Shırek fınalda Qazaqstan quramasynyń erleri Frantsııa sadaqshylarynan 5:3 esebimen aılasyn asyrdy. Jartylaı fınalda da 5:3 esebimen jeńiske jetken Qazaqstan erler quramasy fınalǵa joldama alǵan bolatyn.
Fınal 11 maýsymda ótip, qazaqstandyq sadaq atý sheberleri altyn medalǵa talasta Italııa quramasyna 3:5 esebimen ese jiberip, kúmis medalǵa qol jetkizdi.
Aıta ketý kerek, buǵan deıin Qazaqstan erler quramasy Shanhaıda ótken álem kýbogy kezeńinde komandalyq jarysta altyn medal jeńip alǵan bolatyn. Ol kezde bul jetistigimiz úlken sensatsııaǵa baǵalansa, bul joly sportshylarymyzdyń básekege qabiletti ekendigi dáleldendi", dep jazǵan basqarma basshysy T.Charapıev.
Endi mergenderdiń úshinshi kezeńdegi jarysy AQSh ta ótedi. Biraq bizdiń sadaqshylardyń atalǵan dodaǵa qatysý, qatyspaýy ázirge belgisiz.
Aıta ketý kerek , sadaq atýdan Qazaqstan erler quramasynyń músheliginde Almaty oblysynan úsh sportshy qatysyp jatyr. Olar Denıs Gankın, Sultan Túzelbaev jáne Sanjar Musaev.