Qazaqstandyq sadaq atýshylar 33 komandanyń ishinen 4-shi oryndy enshiledi
ASTANA. QazAqparat - Berlınde sadaq atýdan ótken Álem kýbogynyń 4-shi kezeńinde qazaqstandyq sportshylar 33 komandanyń ishinen 4-shi orynǵa qol jetkizdi, dep habarlaıdy QazAqparat tilshisi.
QR UOK-niń baspasóz qyzmeti taratqan málimetterge súıensek, atalǵan synǵa qatysqan qazaqstandyq sportshylar alǵashqy bestikten kórindi. Jerlesterimiz 33 komandanyń ishinen 4-shi orynǵa ıe boldy.
Klassıkalyq sadaq atýda ulttyq quramanyń úzdigi sanalatyn Denıs Gankın 5-shi orynǵa qol jetkizse, osy baǵdarlama boıynsha synǵa túsken Sanjar Musaev pen Sultan Dúzelbaevtar 9-shy satyǵa taban tiredi. Bul básekege jalpy esebi 136 sportshy qatysty.
Klassıkalyq sadaq atýdan komandalyq synda Qazaqstan ulttyq quramasy tórtinshi oryn ıelendi. Qazaqstan namysyn Denıs Gankın, Sanjar Musaev jáne Ilfat Abdýllın qorǵady. Komandalyq básekege jalpy esebi 33 komanda qatysty.
Kompaýnd básekesinde Aqbaráli Qarabaev 8-shi orynǵa jaıǵasty. Al osy saıystaǵy komandalyq synda K. Solodovnıkov, P. Fısher jáne A. Qarabaev úshtigi 9-shy orynǵa taban tiredi.
Áıelder arasyndaǵy kompaýnd synynda D. Makarchýk, A. Jeksenbınova jáne V. Lıan úzdik segizdikke endi.
