Qazaqstandyq S. Mádıev pen M. Akbarov gollıvýdtyq fılmge tústi
ASTANA. 5 shilde. QazAqparat - Almatylyqtar Sanjar Mádıev pen Maksım Akbarov amerıkalyq «Ólim perishteleri» ekshn-fılmine tústi.
Kınonyń bas keıipkeri - arnaıy jasaq otrıadynyń komandıri esirtki satýmen aınalysatyn bandamen aıqasady. Sońynda buzaqylar onyń áıelin óltirip, balasyn urlap ketedi. Jaýjúrek sarbaz keıin ósh ala bastaıdy, dep habarlaıdy Eýrazııa birinshi arnasy.
Sanjar Mádıevtiń keıipkeri sıýjet boıynsha bas keıipkerge qarsylastaryn jeńip, óz maqsatyna jetýge kómektesedi. Qazaqstandyq akterdiń sózine qaraǵanda, túsirilim kezinde ol «bas keıipker» - reseılik akter Igor Savochkınmen dostasty.
Kartına Los-Andjeles pen San-Dıegoda túsirilgen. Túsirý jumystary táýligine 20 saǵatqa sozylypty. Reseı men Qazaqstan akterlerinen ózge «Ólim perishteleri» fılmine gollıvýdtyq akter Armand Assante men «Qara kıimdiler-3» men «Temir betperdedegi adam» fılmderinde oınaǵan akterler túsipti.
«Meniń keıipkerim aýyr trıýkter oryndaǵan joq dep aıtýǵa bolady. Al qashqynda júrgen tutqyndy oınaǵan Maksım Akbarovqa ońaı tıgen joq. Onyń túsirilimderi aýyr boldy», -deıdi Sanjar Mádıev.
Aıta keteıik, qazaqstandyqtar atalmysh kartınany kelesi jyldyń qańtar aıynda Almaty kınoteatrlarynan kóre alady.
