Qazaqstandyq robototehnıka muǵalimderi birneshe elden komandalaryn jattyqtyrýǵa shaqyrtý aldy

ASTANA. QazAqparat – Oqý-aǵartý mınıstri Ashat Aımaǵambetov robototehnıkadan Qazaqstan quramasynyń pedagog-jattyqtyrýshylary Asylbek Myrzahmetovpen jáne Nurdáýlet Dosmaǵambetpen kezdesti. Mınıstr áriptesterin Shveıtsarııada ótken robototehnıkadan FIRST GLOBAL CHALLENGE-2022 álem chempıonatyndaǵy oqýshylarynyń jeńisimen quttyqtady, dep habarlaıdy QazAqparat tilshisi.

Jattyqtyrýshylar chempıonatqa daıyndyq jáne Indonezııa, Chernogorııa, Islandııa, Perý jáne Lıvan elderiniń ókilderinen kelesi jyly osy memleketterdiń komandalaryn daıyndaýǵa qatysty usynystar túskeni týraly aıtty.

«Bizde robototehnıka qarqyndy damyp keledi. Mundaı usynystardyń túsýi – jumysymyzdyń nátıjesiniń, elimizdiń robototehnıka salasyndaǵy joǵary jetistikteriniń kórsetkishi. Balalardyń osy baǵytqa qyzyǵýshylyǵy joǵary. Mektepterde robototehnıka kabınetteri ashylyp jatyr. Mınıstrdiń birden balalarǵa habarlasyp, arnaıy quttyqtaǵanyna qatty qýandyq. Mınıstrliktiń oqýshylardy robototehnıkaǵa tartýǵa qoldaý kórsetip, osy qozǵalysty damytyp jatqany qýantady», - dedi Nurdáýlet Dosmaǵambet.

Atap aıtqanda, Ulttyq qurama jattyqtyrýshylary Qazaqstanda robototehnıkany odan ári damytýdy kózdep otyr. Osy oraıda, mınıstrmen birge muǵalimder osy baǵyttaǵy birlesken jumystardy talqylady. Ashat Aımaǵambetov 2023 jyly robototehnıkadan aýqymdy halyqaralyq jarysty ótkizýdi qoldady.

Sońǵy jyldary elimizde 3 myńǵa jýyq robototehnıka kabıneti ashyldy. Kabınetter qajetti qural-jabdyqtarmen, oqý jınaqtarymen jáne oqý-ádistemelik quraldarmen jabdyqtalǵan. Sondaı-aq, balalarǵa arnalǵan arnaıy bilim berý baǵdarlamalary ázirlengen.

Ashyq kózderden alynǵan foto