Qazaqstandyq «Rıeltor» fılmi Reseıdiń «Deboshırfılm - Chıstye grezy-XIV» halyqaralyq kınofestıvaline qatysady
ASTANA. 31 qazan. QazAqparat - Qazaqstandyq rejısser Ádilhan Erjanovtyń «Rıeltor» fılmi Reseıde ótetin «Deboshırfılm - Chıstye grezy-XIV» halyqaralyq kınofestıvaline qatysady, dep habarlaıdy Sh. Aımanov atyndaǵy «Qazaqfılm» AQ-nyń resmı saıty.
Saıtta atap kórsetilgenindeı, festıvaldiń basty ıdeıalyq kóshbasshysy jáne prezıdenti «Ine», «Assa», «Chýjaıa Belaıa ı Rıaboı», «Jeleznaıa Pıata Olıgarhıı» fılmi arqyly áıgili bolǵan akter jáne rejısser Aleksandr Bashırov. Festıval onyń «Deboshır. Fılmstýdııa» kınostýdııasymen 1997 jyldan beri uıymdastyrylyp keledi.
Bıyl «Deboshırfılm - Chıstye Grezy-XIV» baıqaýy «Adamdy izdeımin!» atty urannyń aıasynda ótkizilýde.
«Men o bastan-aq fılmimniń osy baıqaýǵa túskenin qaladym. Ol birtýma formatta túsken týyndy. Al men tóltýmalyqty jaqsy kóremin», - deıdi Ádilhan Erjanov.
Saıtta málim etilgenindeı, festıval 10-15 qarasha kúnderi aralyǵynda ótpek. Festıvalde rejısser Vladımır Bortko, sýretshi Nıkas Safronov, kınosynshy Lıýbov Arkýs, jýrnalıst Artemıı Troıtskıı qazylyq etetin bolady.
Eske sala keteıik, «Rıeltor» fılmi bunyń aldynda Reseıdiń Anapa qalasynda ótken «Kınoshok-2011» baıqaýyna qatysyp, qazylardyń arnaıy syılyǵyna ıe bolǵan bolatyn. Sonymen qatar qazaqstandyq «Eýrazııa» atty halyqaralyq kınofestıvaline de qatysty.
