Qazaqstandyq rejısser Frantsııadaǵy halyqaralyq kıno festıvalden shaqyrtý aldy
ALMATY. 4 shilde. QazAqparat /Erlik Erjanuly/ - Frantsııanyń "Sýbe Sınema" prokattyq kompanııasy rejısser, stsenarıst Jánibek Jetirýdy 24 qarashada Nant qalasynda ótetin halyqaralyq festıvalge shaqyryp jatyr.
Buǵan deıin olar onyń "Dúnıejaryq" kórkem fılmin 2008 jyly Kanny festıvaline arnaıy shaqyrǵan bolatyn.
«Nant festıvali aıasynda bizdiń kınojobalarymyz talqylanady. Eger olarǵa unasa kelesi jyly stsenarııdi óndiriske jiberedi. Solardyń suranysy boıynsha 23 tamyzǵa deıin 1 stsenarıı jazyp jiberýim kerek", - deıdi Jánibek Jetirý. Osy ýaqytqa deıin 40-tan astam derekti jáne "Dúnıejaryq", "Aqqyz" dep atalatyn tolyq metrajdy 2 kórkem fılmniń avtory atanǵan ol qazir atalmyş festıvalge eki stsenarııdi jobalap jatqan kórinedi.
"Birinshisi - qalaǵa kelip sińise almaı aýylǵa qaıtatyn jastyń ómiri týraly. Ekinshisi - aýyldaǵy áıeldiń taǵdyry týraly. Jalpy bizde áıeldiń taǵdyry týraly fılm joq. Munda ananyń taǵdyry, qasireti, qýanyshy, onyń ómirdegi róli, anaǵa jáne jalpy áıel zatyna degen qoǵamdaǵy kózqaras talqylanady. Frantsııaǵa osy ekeýiniń birin jiberem", - deıdi J. Jetirý.
