Qazaqstandyq rejısser Á.Erjanovtyń «Úkili Kámshat» týyndysy Ortalyq Azııadaǵy úzdik fılm retinde tanyldy
BІShKEK. QazAqparat - Qyrǵyzstan astanasynda ulttyq «Ak Ilbırs-2015» kınopremııasy aıasynda rejısser Ádilhan Erjanov túsirgen «Úkili Kámshat» fılmi «Ortalyq Azııadaǵy úzdik fılm» nomınatsııasyn jeńip aldy.
Saltanatty rásimde fılm prodıýsseri Serik Ábishevke nagradany Qyrǵyzstannyń qurmetti óner qaıratkeri Gennadıı Bazarov pen top-model Meerım Atantaeva tapsyrdy.
Qazaqstandyq «Úkili Kámshat» fılminiń álemdik premerasy 2014 jylǵy mamyrda Kann festıvalinde ótken. Keıinnen Á. Erjanovtyń jumysyna Gollandııa, Kanada, Polsha, Reseı, Sıngapýr, Slovakııa, Frantsııa jáne Ońtústik Koreıa festıvalderinde kıno synshylary joǵary baǵa berdi.
Fılm azııalyq «Oskar» retinde belgili jyl saıynǵy Asia Pasific Screen Awards syılyǵyn aldy. Kıno operatory - Erkinbek Pitiralıev.
Túrli nomınatsııada 9 nagrada alǵan rejısser Sadyq Sher-Nııazdyń «Qurmanjan Datqa» atty qyrǵyzdyń tarıhı fılmi festıvaldiń bas júldesin aldy.
