Qazaqstandyq rekordsmen qara kúshtiń qupııasy týraly kitap jazyp jatyr

«Bıyl biz aýqymdy jospar boıynsha jumys júrgizemiz dep otyrmyz. Naqtyraq aıtqanda, adam aǵzasynyń ishki áleýetin asha bilý, qara kúshke ıe bolý ádistemesi týraly kitap shyǵarsaq deımiz. Kitap jazý jumysy, áne-mine, aıaqtalady. Meniń oıymsha, bıyl qaraı jaryqqa shyǵady. Kitabym Qazaqstanda ǵana emes, alys-jaqyn shetelderge de taraıdy degen úmitim bar. Bul kitap ár adamǵa qalaı qara kúsh ıesi atanýǵa bolatynyn úırete otyryp, boıyndaǵy kúshi men qabiletin durys baǵdarǵa burýǵa kómektesedi», - dedi aqmolalyq balýan Sputnik Qazaqstan baspasóz ortalyǵynda ótken jıynda.

Balýannyń aıtýynsha, atalmysh kitap az ýaqyttyń ishinde adam boıyndaǵy kúsh qarym-qabiletin ashý múmkindigi boıynsha baǵyt-baǵdar beredi.

«Kitapqa ótken ǵasyrdyń alyp kúsh ıeleriniń ádistemesi engiziledi. Ásirese, KSRO memlekekettik qaýipsizdik komıtetiniń arnaıy bólimsheleriniń ádistemelerin qamtyp otyrmyz. Sonymen birge, kitapta ózim jaıly, qalaı tárbıe kórip, osy kúnge jetkenim jóninde baıandalady», - deıdi ol.

Sergeı Tsyrýlnıkov qazirdiń ózinde birneshe álemdik rekordty jańartýǵa qaýqarly ekenin tilge tıek etti. Biraq, ol qandaı rekordtar ekenin aıtqan joq.

«Rekordtar týraly aıtsam, qazirdiń ózinde 5 rekordty jańartýǵa daıynmyn. Meniń teplovozdy tartqan sońǵy rekordymdy 10-15 mıllıonǵa tarta adam tamashalady. Qytaıdyń ózinde 4 mıllıondaı adam kóripti. Rekordtardy jańarta berýge ázirmin, biraq bul qadamdar meni jigerlendirip otyrsa deımin», - dedi balýan.

Eske sala ketsek, ótken jyldyń mamyr aıynda Sergeı Tsyrýlnıkov salmaǵy 148 tonnalyq vagon tirkeýli teplovozdy birneshe metrge súırep aparyp, rekord ornatqan bolatyn.

Al ótken jyldyń sońynda Qazaqstan men Reseıdiń Óńiraralyq yntymaqtastyǵynyń XV forýmynda aqmolalyq palýan Reseı Federatsııasynyń Prezıdenti Vladımır Pýtınge eki el dostyǵynyń sımvoly retinde órilgen shegelerdi syıǵa tartqan edi.