Qazaqstandyq professor álemdegi eń bedeldi ǵalymdardyń tizimine endi

ASTANA. QazAqparat - Aýyl sharýashylyǵy mınıstrligi qazaqstandyq professordyń álemdegi eń bedeldi ǵalymdardyń tizimine engenin málimdedi, dep habarlaıdy QazAqparat.

Jáńgir han atyndaǵy Batys Qazaqstan Agrarlyq-tehnıkalyq ýnıversıtetiniń professory, tehnıka ǵylymdarynyń doktory Sársenbek Montaev «Álemdegi eń bedeldi ǵalymdardyń 2%-y» (World’s Top 2% Scientists) reıtıngine engen.

Elsevier ǵylymı baspasynyń sońǵy málimetterine sáıkes, álemniń eń úzdik ǵalymdaryn Stenford ýnıversıtetiniń sarapshylary qurastyrdy. Reıtıng negizine búkil bıblıometrııalyq málimetteri: ǵalymdardyń mansabyndaǵy barlyq jáne ótken jyldaǵy dáıeksózderi alynady.

Sársenbek Montaev qazir ýnıversıtettiń Indýstrıaldy-tehnologııalyq ınstıtýtyn basqarady. Qurylys materıaldaryn óndirýde jańa tehnologııalardy ázirleýshi, sondaı-aq aýyl sharýashylyǵy maqsatyndaǵy jerlerdiń topyraǵynyń qurylymdyq-mehanıkalyq qasıetterin jaqsartý jónindegi jobanyń basshysy.

Professor «Bolashaq» baǵdarlamasy aıasynda Japonııada nanotehnologııa mamandyǵy boıynsha ǵylymı taǵylymdamadan ótken.

Foto: wkau.kz