Qazaqstandyq polıtsııa týraly fılm túsiriledi
ALMATY. QazAqparat - QR Іshki ister mınıstri Erlan Turǵymbaevtyń bastamasymen qazaqstandyq polıtsııanyń oń ımıdjin qalyptastyrý jumysy jalǵasýda. Osy maqsatta Almaty akademııasynyń bastyǵy, polıtsııa polkovnıgi Aıdar Saıtbekov Sháken Aımanov atyndaǵy «Qazaqfılm» kınostýdııasynyń prezıdenti Aqan Sataevpen kezdesti, dep habarlaıdy QazAqparat.
Kezdesý barysynda taraptar ishki ister organdary qyzmetkerleri jaıly jobalar tóńireginde pikir almasyp, ózara áriptestik týraly memorandýmǵa qol qoıdy.
Bolashaqta túsiriletin fılm el qaýipsizdigi úshin basyn qaterge tigip júrgender men táýelsiz elimizdiń polıtsııasynyń abyroıyn kóterýge, jaǵymdy ımıdjin qalyptastyrýǵa arnalmaq.
Óz kezeginde «Qazaqfılm» basshysy Aqan Sataev qazaqstandyq polıtsııa ımıdjin kóterýge kıno mamandarynyń da múddeli ekenin jetkizdi.
Kezdesýde bolashaqta akademııada bilim alyp júrgen kýrsanttardyń ómirinen, qyzmette erlik kórsetkender, sondaı-aq kýrsant tyńdaýshylardyń ómirinen komedııa janrynda fılmder túsirý týraly áńgime órbidi.
«Bizde qoǵamda polıtsııa jumysyn jaǵymsyz jaǵynan kórsetý tendentsııasy basym bolyp tur. Al, shyndyǵynda kún saıyn tártip saqshylary ómirlerin qaterge tigip, erlik kórsetip jatady. Tabıǵattyń tosyn minezine qarsy turyp, aqtútek boranda júrgizýshilerdi aman alyp shyqqan ınspektordyń erligin osy qysta kúlli jurt estidi. Sol sekildi erlik jasaǵan birqatar polıtseılerdiń bárin de el bilip jatqan joq. Osynyń barlyǵy kıno sheberleriniń qolymen kórermenge jetse», - deıdi A. Saıtbekov.
Júzdesý nátıjesine sáıkes, polıtsııa qyzmetinde oń ımıdj tanytatyn jobalar janry anyqtalyp, qarjy kózderi qarastyrylatyn boldy.
Asyljan Muhtar
