Qazaqstandyq polıtseılerge ses kórsetken Qytaı azamatynyń isi sotqa joldandy
TALDYQORǴAN.QazAqparat - Qazaqstan-Qytaı shekarasynda shetel azamatynyń qazaqstandyq tártip saqshylaryna baǵynbaı jatqan beınejazba áleýmettik jelini shýlatty. Oqıǵa «Qorǵas» shekara mańy yntymaqtastyǵy halyqaralyq ortalyǵynda 31 -shi qazanda bolǵan, dep habarlaıdy QazAqparat tilshisi.
Oblystyq ІІD baspasóz qyzmetindegilerdiń málimetinshe, basqa bir kúdiktini tutqyndaýǵa barǵan polıtsııa qyzmetkerlerine 1976 jylǵy Qytaı azamaty aralasyp arasha túsken. Bul jaıt beınetaspaǵa jazylyp qalǵan. Ol jerde sheteldik azamat dóreki sóılep, tórt bılik ókiline ses kórsetedi.
«Beınejazbadaǵy adam Qytaı Halyq Respýblıkasynyń azamaty. Ol qazirgi ýaqytta ustalyp, oǵan qatysty QR Ákimshilik Kodeksiniń 667 babyna sáıkes hattama toltyryldy. Jınalǵan materıaldar aýdandyq sottyń qaraýyna joldanǵan», dedi oblystyq ІІD baspasóz qyzmetiniń bas mamany Janar Tólegenqyzy.
Sondaı-aq, Almaty oblystyq ІІD baspasóz qyzmetindegiler oqıǵanyń Panfılov aýdany «Qorǵas» ShYHO-da 2017 jyldyń 31 qazanda bolǵanyn málim etti.
