Qazaqstandyq polıtseılerdiń 30 myń qoǵamdyq kómekshisi bar

ASTANA. QazAqparat - Qazaqstandyq polıtseılerdiń 30 myń qoǵamdyq kómekshisi bar. Bul týraly búgin Úkimet úıinde «100 naqty qadam» Ult josparynyń iske asyrylý barysyna arnalǵan baspasóz máslıhatynda QR Іshki ister vıtse-mınıstri Erlan Turǵymbaev málim etti, dep habarlaıdy QazAqparat.

«Shyndyǵynda da bizge qoǵamdyq kómekshiler qajet-aq. Qazirgi ýaqytta bizde 5 myńǵa jýyq qoǵamdyq qurylym bar, shamamen 30 myń azamat qoǵamdyq tártipti qorǵaýǵa qatysady. Olar: zeınetkerler, ishki ister organdarynyń ardagerleri, stýdent jastar. Máselen, stýdentter qalashyqtarynda qoǵamdyq tártip qorǵaý men jataqhanalardy sholý úshin jastardy barynsha tartamyz», - dedi Turǵymbaev.

Onyń paıymynsha, bul qoǵamdyq tártipti qorǵaýǵa jaýapkershilikpen qaraýǵa jumyldyrýdyń belsendi túriniń biri.

«Buǵan qosa qylmystyq jáne ákimshilik quqyqbuzýshylyqqa jatpaıtyn keıbir sátterdi qoǵamnyń ózi áshkerelýi tıis. Ónege, ádep jáne qoǵamdaǵy júris-turys máseleler bar. Menińshe, bul rette ýchaskelik polıtseıdiń, mektep ınspektorynyń jáne azamattardyń birlesken jumysy oń áser beretin bolady», - dedi vıtse-mınıstr.

Onyń aıtýynsha, mal urlyǵy jıi oryn alatyn aýyldyq jerlerde polıtsııaǵa kómek beretin arnaıy jasaqtar qurylǵan. Dál osyndaı jasaqtar bar óńirlerde mal urlyǵy joq desek te bolady.