Qazaqstandyq polıtseıler kúdiktini quryqtaý kezinde «Mıranda quqyqtaryn» oqýǵa mindetteledi

ASTANA. QazAqparat - Jańa Qylmystyq-protsesýaldyq zańnama boıynsha Qazaqstanda «Mıranda quqyqtary» engizildi. Endi budan bylaı polıtseıler kúdiktini quryqtaý kezinde onyń quqyqtaryn oqyp berýi shart. Bul týraly Bas prokýratýrada jańa Qylmystyq-protsessýaldyq zańnamaǵa kóshý máselelerine arnalǵan brıfıngte Qylmystyq protsestiń sotqa deıingi satysynyń zańdylyǵyn qadaǵalaý departamentiniń bastyǵy Ámirhan Amanbaev málim etti.

"Jańa zańnamaǵa sáıkes, polıtseıler qylmyskerdi nemese kúdiktini quryqtaý jáne qamaýǵa alý kezinde olardyń quqyqtaryn oqyp berýi mindetti. Eger ol oryndalmasa, ustalǵan azamat prokýratýra organdaryna shaǵymdana alady", - dedi departament basshysy.

AQSh-ta qoldanylatyn "Mıranda quqyqtary" polıtseılerdi kúdiktini ustaý kezinde oǵan quqyqtary men mindetterin, onyń ishinde advokat jaldaý quqyǵy men únsiz qalý quqy baryn jáne barlyq aıtqandary kúdiktiniń ózine qarsy qoldanylýy múmkin ekenin eskertýdi mindetteıtin erejeler jańa zańǵa kirgizilgen.

Onyń aıtýynsha, buǵan qosa jańa kodeks jobasynda kúdikti kinásin moıyndaǵan jaǵdaıda jáne tergeý isine kómek kórsetse, jazasyn jeńildetý múmkindikteri de qarastyrylǵan.

Aıta keteıik, Qazaqstan Ortalyq Azııada zańnamasynda "Mıranda quqyqtary" qoldanylatyn alǵashqy memleket bolyp otyr.