Qazaqstandyq polıtseıler iri esirtki saýdagerlerimen kúresti jandandyrýlary kerek - T. Sımambaev
ANA. 15 naýryz. QazAqparat /Qanat Mámetqazyuly/ - Qazaqstandyq polıtseıler iri esirtki saýdagerlerimen kúresti jandandyrýlary kerek.
Búgin QR Parlamenti Senaty Agrarlyq máseleler jónindegi komıtettiń keńeıtilgen otyrysynda «Esirtki, psıhotroptyq zattar, prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly» zań jobasyn talqylaý barysynda senator Tasbaı Sımambaev osylaı málim etti.
«Elimizde jurtshylyqtyń basym bóligi esirtki barondary - joǵary qyzmettegi azamattar arasynda júr dep biledi. Ondaı esirtki barondary álgi joǵary laýazymdy azamattarmen aralasyp turady, alaıda onyń esirtkige qatysy bar ekendigin qarapaıym azamattar da biledi», - deıdi T. Sımambaev. Bul rette senator esirtki bıznesine qarsy kúres sheńberinde tek usaq saýdalaýshylar ǵana ustalyp jatqanyn tilge tıek ete otyryp, naqty esirtki barondarynyń ustalǵany týraly aqparat bolmaǵandyǵyna nazar aýdartty. «Eýropa memleketteri men Reseı Qazaqstan arqyly ótetin esirtki trafıgine de alańdaýshylyq bildiredi. Olar da quqyq qorǵaý organdary arasynan esirtki saýdasyna qatysy bar tulǵalar týraly aıtady. Jalpy, qazaqstandyq polıtseılerge AQSh, eýropa elderi organdarynan úlgi alýlary kerek. Bul elderde esirtki bıznesimen kúreste aıaýshylyq joq», - dedi T. Sımambaev.
