Qazaqstandyq polıtseı Búkilálemdik oıyndarda 2-oryn aldy

BRıÝSSELЬ. QazAqparat – 22-31 shilde kúnderi Nıderlandta Búkilálemdik polıtsııa jáne órt sóndirýshiler oıyndary ótip jatyr. On kún boıy Rotterdam port qalasy iri jáne biregeı halyqaralyq sport jarystarynyń sahnasyna aınalady, dep habarlaıdy QazAqparat menshikti tilshisi.

Bıyl Búkilálemdik polıtsııa jáne órt sóndirýshiler oıyndaryna 70 elden 10 myńnan astam adam qatysýda. Onyń ishinde Qazaqstan ókilderi de bar.

Qatysýshylar sporttyń 63 túrinen, sonyń ishinde boks, krossfıt, jeńil atletıka, sý doby, kaıtserfıng jáne «Úzdik órt sóndirýshi» nomınatsııasynda baq synap jatyr.

Oıyn uıymdastyrýshylarynyń pikirinshe, bul jarys ártúrli elderdiń shuǵyl áreket etý qyzmetkerleri arasynda baılanys ornatýdyń jaqsy quraly bolmaq. Sonymen qatar oıyndardyń maqsaty – qyzmetkerlerdiń sporttyq sheberligin yntalandyrý, kez kelgen ýaqytta bizge kómektesýge daıyn turatyn barlyq tótenshe jaǵdaılar qyzmetkerine qurmet kórsetý.

Búkilálemdik polıtsııa jáne órt sóndirýshiler oıyndary (World Police and Fire Games, WPFG) 1985 jyldan bastap ótkizilip keledi. Bul jarysqa jumys istep júrgen jáne otstavkadaǵy polıtseıler men órt sóndirýshiler qatysady.

Rotterdam qalasynda bokstan ótken jarysta Sáken Qusaıynov 86 kelige deıingi salmaqta ekinshi oryn aldy. 34 jastaǵy otandasymyz – Semeı qalasynyń týmasy. Ol – bokstan 2004, 2005 jyldardaǵy Qazaqstan chempıony, 2006 jyly Bakýdegi Halyqaralyq týrnırdiń jáne 2005 jylǵy QR Prezıdenti Kýbogynyń júldegeri.