Qazaqstandyq pavılon VDNH injý-marjanyna aınalýy tıis -Tasmaǵambetov
ASTANA. QazAqparat - Qazaqstan Respýblıkasynyń Reseı Federatsııasyndaǵy Elshisi Imanǵalı Tasmaǵambetov VDNH-da (Halyq sharýashylyǵy jetistikteri kórmesi) qaıta jóndelip jatqan qazaqstandyq ǵımarat keshenine baryp kóshpeli jıyn ótkizdi, dep habarlaıdy QazAqparat elshilik saıtyna silteme jasap.
Astananyń 20 jyldyǵyna oraı túrli kórmeler ortalyǵyna aınalǵan Máskeýdegi VDNH-daǵy Qazaqstandyq ǵımarat kesheni Astananyń 20 jyldyǵyna oraı qaıtadan jańartylyp, sáýlet óneriniń sońǵy úlgisine saı áspettelip, sý jańa kúıinde ashylýǵa ázirlik jumystaryn júrgizýde. Qurylys jumystaryna jaýapty tulǵalarǵa jıyn ótkizgen Qazaqstannyń elshisi Imanǵalı Tasmaǵambetov, bul eń aldymen elbasy N.Nazarbaevtyń qoldaýymen jasalyp jatqan iri joba ekendigine toqtaldy. Jýyrda keshen osy jerdiń injý-marjanyna aınalyp, elimizdiń abyroıyn Reseı jerinde asqaqtatatynyn aıtty.
Búgingi kúni qurylys jumystarynyń qarqynyna qarap, ǵımarattyń tek ishki ǵana emes, sondaı-aq syrtqy kelbeti aıryqsha ózgeretini baıqalyp otyr. Sebebi qaıta jańartylyp jatqan keshen adam tanymastaı ózgergen. 
«Qazaqstannyń ǵımaraty ózgelerge qaraǵanda oq boıy ozyq turýy shart. Sol sebepti qurylys júrgizip jatqan top eń aldymen sapasyna mán aýdarsa, onyń ýaqtyly bitirýin de qaperinen shyǵaryp almaýy tıis», - dedi Imanǵalı Tasmaǵambetov.
Onyń aıtýynsha, kúrdeli jóndeý jumystary barysynda ǵımarattyń kire berisi, ishki qurylymy men kompozıtsııasy erekshe sáýlet óneriniń talaptaryna saı jasalyp, baspaldaǵy men tereze áınekpen kómkerilgen kúmbez tárizdi shańyraǵy jańadan salynady.
Eskere ketý kerek, federaldyq mádenı mura retinde tanylǵan 11 «Metallýrgııa» kesheni 1964 jyly Qazaq KSR-nyń halyq sharýashylyq jetistikterin kórsetetin, keıinnen respýblıkamyzdyń túrli-tústi metallýrgııa, munaıgaz jáne kómir óndirý ónerkásibin pash etetin jerine aınaldy. Al 2011 jyly Reseı Federatsııasy Úkimetiniń qaýlysyna sáıkes Qazaqstanǵa 50 jylǵa jalǵa berildi. 
