Qazaqstandyq parlamentshiler delegatsııasy PAO 132-Assambleıasyna qatysady
ASTANA. QazAqparat - Májilis Tóraǵasy Qabıbolla Jaqypov bastaǵan qazaqstandyq parlamentshiler delegatsııasy resmı saparmen Vetnam Sotsıalıstik Respýblıkasynda júr, búgin onda Parlamentaralyq Odaqtyń 132-Assambleıasy ashylady. Bul týraly QR Parlamenti Májilisi Apparatynyń baspasóz qyzmetinen habarlady.
Joǵary parlamenttik jıynǵa osy jyly ózek bolǵan taqyryp - 2015-jyldan keıingi turaqty damý maqsattary. Ortaq pikir almasýlar kezinde Májilis Tóraǵasy Q. Jaqypovtyń sóz sóıleýi kútilýde.
Sondaı-aq, sapar baǵdarlamasy aıasynda Vetnam Prezıdenti Chyong Tan Shangmen, Parlamentaralyq Odaq Tóraǵasy Saber Hosseın Choýdhýrımen, Vetnam, Germanııa, Iordanııa parlamentteriniń spıkerlerimen kezdesýler josparlanǵan.
Búgin resmı sapar barysynda qazaqstandyq parlamentshiler Vetnamnyń soltústik shyǵysyndaǵy týrıstik jáne ónerkásiptik damyǵan Kýang Nın provıntsııasynda boldy.
Provıntsııanyń ákimshiliktik ortalyǵy Halong qalasynda Májilis Spıkeri Qabıbolla Jaqypov provıntsııanyń partııalyq komıteti hatshysynyń turaqty orynbasary Kýang Nın Do Hı Hoanmen kezdesti.
Q. Jaqypov Vetnam Kommýnıstik partııasy qurylýynyń 85 jyldyǵymen, sondaı-aq, Vetnam Sotsıalıstik Respýblıkasy táýelsizdiginiń 70 jyldyǵymen quttyqtady.
Májilis Spıkeri Qazaqstanda júzege asyrylyp jatqan mańyzdy baǵdarlamalardan habardar etti. Sonyń ishinde, «Nurly jol» jańa ekonomıkalyq saıasatyna aıryqsha kóńil bólindi.
Yntymaqtastyqtyń mańyzdy baǵyttary qatarynda taraptar munaı-gaz, týrızm, telekommýnıkatsııa salalaryna nazar aýdaryp, sondaı-aq, Kedendik Odaqpen erkin saýda aımaǵyn qurý týrasynda ózara is-qımyl máselelerin atap ótti.
Qabıbolla Jaqypov pen Do Hı Hoan qazaqstandyq-vetnamdyq qatynastyń, sonyń ishinde, aımaqtar arasyndaǵy baılanysty nyǵaıtýdyń mańyzdylyǵyna toqtaldy.
Júzdesýge sonymen qatar, delegatsııa músheleri, Májilis depýtattary M.Áshimbaev, R.Madınov, V.Kııanskıı, Ý.Medeýov jáne senator E.Muqaev qatysty.
