Qazaqstandyq parataekvondoshy álem chempıony atandy
Bapkeri Erbol Merǵalıevtiń aıtýynsha, Málik Muqashev 80 kg salmaqta aldymen túrik sportshysyn utty.
Fınalda reseılik parataekvondoshymen shyǵyp, eki sekýnd qalǵanda, qarsylasyn 41:39 esebimen jeńdi.
Málik buǵan deıin álem birinshiliginde jeti jyldan beri baq synap, úzdik nátıjesi – besinshi orynmen shektelgen edi. Bıyl Málik Muqashev Azııa, Eýropa birinshiligi, Qazaqstan spartakıadasy, endi, mine, álem chempıonatynda jeńis tuǵyryna kóterilip, tórt altyn medaldi jeńip alyp otyr.
BQO dene shynyqtyrý jáne sport basqarmasynan alynǵan málimetke qaraǵanda, Málik Muqashev 1986 jyly Oral qalasynda dúnıege kelgen.
Terekti aýdany Podstepnyı aýylynda orta mektepte bilim alǵan. 1998 jyly Bórli aýdany ortalyǵy Aqsaı qalasyna qonys aýdarǵan. 2000 jyly tok soǵyp, qatty kúıik alyp, eki qolynan aıyrylǵan. Aqsaıdaǵy №3 orta mektepti, sosyn 2006 jyly Oral qalasyndaǵy qarjy-ekonomıkalyq kolledjin býhgalterlik esep jáne aýdıt mamandyǵy boıynsha bitirgen. Batys Qazaqstan ınjenerlik-tehnologııalyq ýnıversıtetinde joǵary bilim alyp, dene shynyqtyrý pániniń muǵalimi atandy.
2014 jyldan bastap taekvando jattyqtyrýshysy Erbol Merǵalıevtiń qolastynda jattyǵyp keledi. Sol jyly parataekvandodan Eýropa ashyq chempıonatynda qola júldege ıe boldy. 2016-2018 jyldary Azııa chempıonatynyń úsh dúrkin júldegeri atandy. 2019 jyly Eýropa chempıony ataǵyna qol jetkizdi.
Bıyl Lıvan astanasy Beırýt qalasynda ótken VI Azııa chempıonatynda úzdik shyqqan BQO múmkindikteri shekteýli adamdarǵa arnalǵan sport klýbynyń sportshysy, bórlilik Málik Muqashevqa tirek-qımyl apparaty zaqymdalǵan sportshylar arasynda parataekvondodan halyqaralyq dárejedegi sport sheberi ataǵy berildi.
Eske sala keteıik, budan buryn Táýelsizdiktiń 30 jyldyǵyna oraı Batys Qazaqstanda úzdik atbegiler marapattalǵanyn jazǵan bolatynbyz.
