Qazaqstandyq paralımpıadashylar júzýden Álem chempıonatynda 9 altyn, 11 kúmis, 3 qola enshiledi
ASTANA. 15 naýryz. QazAqparat - 8-10 naýryzda Esberg qalasynda ótken Danish Open-2013 halyqaralyq týrnırinde qazaqstandyq múmkindigi shekteýli sportshylar joǵary nátıjege qol jetkizdi.
Aǵymdaǵy jyldyń tamyz aıynda Kanadada ótetin álem chempıonatyna irikteý bolyp tabylatyn týrnırge 10 eldiń myqty sportshylary qatysty.
Astana qalasy resmı saıtynyń habarlaýynsha, qazaqstandyq komandada 6 atlet bolsa, olardyń úsheýi elordalyq «Qaısar» klýbynyń tárbıelenýshileri. Balalar barlyǵy 23 medalge ıe boldy. Olardyń 9-y altyn, 11-i kúmis, 3-eýi qola medal.
Sonymen qatar, irikteý kezeńiniń barlyq normatıvterin oryndaǵan astanalyq Ánýar Ahmetov pen Jambyl oblysynyń ókili Zýlfııa Ǵabıdýllına álem chempıonatyna joldama aldy.
Kózinen múgedek 20 jasar Ánýar Ahmetov birneshe jyl qatarynan joǵary kórsetkishterge qol jetkizip keledi. Bul joly ol 4 altyn, 3 kúmis medal enshiledi.
«Qaısar» klýbynyń taǵy bir ókili Mıhaıl Eremenko S-6 sanatynda (SPODA) shalqalaı júzýde 100 metrlik qashyqtyqta 2 ret ekinshi bolyp keldi. Osy sanatta jarys jolyna shyqqan Sııazbek Dálıev qola júldeger atandy.
Astana qalasyndaǵy «Qaısar» sport klýbynyń aǵa jattyqtyrýshysy, júzýden QR eńbek sińirgen sport sheberi Vladımır Zagorodnııdiń aıtýynsha, týrnırde básekelestik óte úlken bolǵan. Sondyqtan bul medaldarǵa bizdiń sportshylar bar kúshi men ynta-jigerlerin sarqa qol jetkizgen. «Básekelesterdiń barlyǵy Paraolımpıada oıyndarynyń júldegerleri boldy. Soǵan qaramastan bizdiń sportshylar joǵary sheberlik kórsetip, alǵa shyqty», - deıdi Vladımır Kırıllovıch.
