Qazaqstandyq paralımpıadashylar Oıyndardyń ashylý saltanatynda júrip ótti
BEIJІŃ. QazAqparat - Beıjińdegi Ulttyq stadıonda 2022 jylǵy XIII qysqy Paralımpıada oıyndarynyń ashylý saltanaty ótip jatyr, dep habarlaıdy QazAqparat menshikti tilshisi.
«Qus uıasy» dep atalatyn stadıonda 50-ge jýyq eldiń paralımpıadashylary memlekettik týlaryn kóterip ótýde.
Bul sharaǵa qazaqstandyq sportshylar da qatysty. Qazaqstan Paralımpıada quramasynan Memlekettik týdy ustap shyǵý qurmeti para-shańǵy jarysynan Álem kýbogynyń qola júldegeri, Halyqaralyq dárejedegi sport sheberi Erbol Hamıtovke berildi. QR Paralımpıada quramasyna Aleksandr Gerlıts, Sergeı Ýsoltsev, ıÝrıı Berezın jáne Denıs Petrenko endi.
Qazaqstandyq atletter para-shańǵy jarysy men parabıatlonda óner kórsetedi.
Beıjińdegi oıyndar barysynda sporttyń alty túrinen: shańǵy jarysy, bıatlon, taý shańǵysy sporty, sledj-hokkeı, kerlıng jáne snoýbordtan 78 júlde jıyntyǵyn sarapqa salynady. Qazaqstandyqtar qatysatyn alǵashqy jarys túri - parabıatlon. El namysyn Sergeı Ýsoltsev pen Aleksandr Gerlıts qorǵaıdy. Jarys 5 naýryzda Hebeı provıntsııasynyń Chjantszıakoý qalasynda ótedi.
XIII qysqy Paralımpıada oıyndary Beıjińde 4-13 naýryz aralyǵynda ótedi. Oǵan 50-ge jýyq elden 700-den astam sportshy qatysýda.
