Qazaqstandyq palýandar AQSh-ta ótken týrnırde birinshi oryndy oljalady
ASTANA. QazAqparat - Qazaqstandyq grek-rım kúresiniń ókilderi AQSh-tyń Kolorado-Sprıngs qalasynda ótken «Deıv Shýltstiń memorıaly» atty XVI halyqaralyq týrnırde jalpykomandalyq esep boıynsha birinshi oryndy ıelendi. Bul týraly Qazaqstannyń Grek-rım, erkin jáne áıelder kúresi federatsııasy habarlaıdy.
Federatsııanyń málimetinshe, 13 palýannan quralǵan bizdiń komandanyń músheleri 7 salmaq dárejesi boıynsha óner kórsetken. Tańat Saǵyndyqov bastap barǵan komanda óz qorjynyna 2 kúmis, 2 qola medal salǵan.
59 keli salmaqtaǵy palýanymyz Meırambek Aınaǵulov Japonııa, AQSh, Qytaı sportshylarynan basym túsip, fınaldyq joldamaǵa arnalǵan jekpe-jekte ǵana tize búkken. Al 71 keli salmaqtaǵy Ashat Jańbyrov qola júlde ıelense, 80 keli salmaqtaǵy Azamat Kústibaev kúmis medaldi qanjyǵasyna baılady.
98 kelidegi Erulan Ysqaqov bolsa, fınalda qytaılyq Dı Ksıaoǵa jol berip, ol da kúmis júlde ıegeri atandy. Al Ilıa Nastochenko qola júldeni enshiledi.
