Qazaqstandyq palýan Tegerandaǵy týrnırde top jardy
ASTANA. QazAqparat - Qazaqstandyq palýan Rasýl Kalıev erkin kúresten Tegeranda ótken Takhti Cup týrnırinde kúmis júldeni jeńip aldy, dep habarlaıdy Vesti.kz.
Týrnırdiń alǵashqy kúni tórt salmaq boıynsha medaldar sarapqa salyndy. Eń jeńil, 57 keli salmaqta beldesken qazaqstandyq Rasýl Kalıev aqtyq saıysqa deıin jetti. Alaıda, bas júlde úshin aıqasta ol QHDR palýany Ion Hak Djınge ese jiberip aldy.
Al, 65 salmaqty saıysqa túsken otandasymyz Dáýren Jumaǵazıev qola medaldi mise tutty. Bul salmaqtaǵy chempıondyq ataqty grýzın palýanynan aılasyn asyra bilgen ırandyq Meısam Nasırı enshiledi. 74 keli salmaqta tórt birdeı otandasymyz saıysqa tústi. Olardyń arasynda London Olımpıadasynyń júldegeri Aqjúrek Tańatarov ta bar. Ókinishke oraı, bul joly baǵy janbady. Bir qýanarlyǵy, onyń ornyna qazaqstandyq Tsotn Baramıdze júldeger atandy.
