Qazaqstandyq palýan qyzdar Álem chempıonatynda 1 kúmis, 1 qola medal oljalady
ALMATY. 24 tamyz. QazAqparat - Bakýde áıelder kúresinen jasóspirimder arasynda ótip jatqan Álem chempıonatynda keshe qazaqstandyq palýan qyzdar 1 altyn, 1 kúmis medal ıelendi.
Onda Azııa chempıonatynyń kúmis júldegeri Svetlana Ankıcheva (38 kg) bul joly Álem chempıonatynyń kúmis, al Azııa chempıonatynyń qola júldegeri Irına Borısova (43 kg) Álem chempıonatynyń qola júldesin oljalady. Olardyń komandalas dostarynan «Azııa balalary» halyqaralyq oıyndarynyń kúmis júldegeri Marına Sedneva (49 kg) alǵashqy beldesýde jarys qojaıyny Aıan Mammadovaǵa utyldy. Azııa chempıonatynyń qola júldegeri Svetlana Sergeeva (56 kg) da kelesi bir ázirbaıjandyq Alena Kolesnıktiń osal tusyn taba almady. Qazaqstan chempıonatynyń jeńimpazy Zarına Qunanǵaraeva (65 kg) bolsa úndistandyq Babıta Babıtaǵa ese jiberdi.
Búgin endi Madına Baqbergenova (52 kg), Marına Zýeva (40 kg), Gúlmaral Erkebaeva (70 kg), Irına Kazıýlına (60 kg) óz baqtaryn synaýda. Byltyr Býdapeshtte ótken Álem chempıonatynda Qazaqstan quramasy Ekaterına Larıonova (60 kg) Álem chempıony, al Svetlana Ankıcheva (38 kg) qola júldeger atanǵan bolatyn.
