Qazaqstandyq palýan halyqaralyq týrnırde jeńiske jetti
NUR-SULTAN. QazAqparat - Kúsh ekstrıminen Qazaqstan rekordshysy Sergeı Tsyrýlnıkov Sankt-Peterbýrg qalasynda ótken Vortex Sport Battle 7 týrnırinde reseılik myqtyny jeńdi, dep habarlaıdy QazAqparat tilshisi.
«Postkeńestik keńistiktiń myqty atletteri qatysatyn bul týrnırge ózge de elderden alyp kúsh ıeleri shaqyrylady. Jarys kúsh ekstrımi, krossfıt jáne ózge de sport túrleri boıynsha ótti», - dedi ol.
S.Tsyrýlnıkov «sahnalyq ekstrım» jarysyna qatysqan. Ol 5 tapsyrmadan turady. Aldymen uzyndyǵy 200 mm-lik shegeni órip, odan keıin 5 shegeni taqtaıǵa qaǵý kerek. Úshinshi saıysta sportshylar «Borjomı» bankisin qolmen myjǵylaıdy. Al tórtinshi kezeńde bes kúntizbeni jyrtýy tıis. Sońǵy satyda sportshylarǵa qalyńdyǵy 16 mm bolatyn 3 temir taıaqty búgýge týra keledi. Osy saıysta Qazaqstan sportshysyna Reseıdiń bes dúrkin rekordshysy, álem rekordynyń ıesi Mıhaıl Savın qarsylas boldy.
«Bastapqy 4 kezeńdi ekeýmiz de ońaı ári birdeı aıaqtadyq. Sońǵy tapsyrmada ekeýimizde de problema týyndady. Qorytyndysynda 5 mınýt ýaqytymdy shyǵyndap, bir temir taıaqty búge aldym. Al Mıhaıl olaı jasaı almady. Sóıtip, men jeńimpaz boldym», - deıdi qazaqstandyq alyp kúsh ıesi.
Eske sala ketsek, ótken jyldyń mamyr aıynda Sergeı Tsyrýlnıkov salmaǵy 148 tonnalyq vagon tirkeýli teplovozdy birneshe metrge súırep aparyp, rekord jasaǵan. Al ótken jyldyń sońynda Qazaqstan men Reseıdiń Óńiraralyq yntymaqtastyǵynyń XV forýmynda aqmolalyq palýan Reseı Federatsııasynyń Prezıdenti Vladımır Pýtınge eki el dostyǵynyń sımvoly retinde órilgen shegelerdi syıǵa tartqan edi.
