Qazaqstandyq otbasynyń Antalııada shala týǵan sábıi shetinep ketti
ASTANA. QazAqparat - Pavlodarlyq otbasy Vladımır Troşenko men Elena Shevchýkovanyń Antalııada shala týǵan sharanasy shetinep ketti. Qazir sábıdiń ólimi naqty neden bolǵany anyqtalyp jatyr. Bul týraly QazAqparat tilshisine QR Syrtqy ister mınıstrligi baspasóz qyzmetiniń jetekshisi Ánýar Jaınaqov málim etti.
«Sábı keshe shetinedi. Biz eń aldymen onyń ata-anasyna habar berdik. Búgin Antalııadaǵy konsýlymyz bala týǵan klınıkanyń qyzmetkerlerimen birge balany Antalııada jerleý máselesimen aınalysty. Sábıdiń ata-anasy Túrkııadan Qazaqstanǵa oralmaı turyp, eger bala ómir súre almasa, ony sol jaqta jerleýge ruqsattaryn bergen», - deıdi Á.Jaınaqov.
Pavlodarda turatyn Vladımır Troşenko men Elena Shevchýkova maýsym aıynyń ortasynan asa ózderine syılyq retinde tabystalǵan joldama arqyly Antalııa qalasyna demalýǵa attanǵan bolatyn. Birneshe kúnnen keıin Elenanyń densaýlyǵy kúrt syr berip, ol aýrýhana túsken. 23 maýsym kúni anany aman alyp qalý úshin túrir dárigerleri tolǵaq shaqyryp, salmaǵy 750 gramdyq ul bala dúnıege keledi.
Óte álsiz sábıdi aýrýhanadan shyǵarý úshin onyń salmaǵy keminde 2 kelige jetýi kerek edi. Ol úshin dárigerler shamamen 2 aı ýaqyt kerek dep tapqan. Al, balanyń klınakada jatqan árbir kúni úshin 900 dollar qajet bolǵan. Eger Antalııadaǵy Qazaqstannyń konsýldary iske aralasyp, barlyq dıplomatııalyq sharalardy qolǵa almaǵanda, Elena men onyń zaıyby kúnine 3 000 dollarǵa jýyq qarjy tóleýi tıis edi. Elenanyń emdelgen ár kúnine de mol qarajat kerek bolǵan soń, otbasy sábılerin Antalııa klınıkasyna amanat etip, ózderi qarjy tabý úshin Qazaqstanǵa keledi. Ókinishke qaraı, keshe ol otbasynyń úmiti úzildi.
«Men sábıdiń ákesimen sóılestim. Ol balany sol jaqta jerleýge ruqsat bergenderin taǵy bir ret rastady. Qarajattan qıyndyq kórip otyrǵandyqtan, ózderi jerleýge qatysa almaıtynyn aıtty», - dep túıindedi sózin Á.Jaınaqov.
