Qazaqstandyq otbasylardyń shamamen 15 paıyzy bala súıe almaı júr
ALMATY. QazAqparat – Bedeýlik – árbir onynshy qazaqstandyq otbasynyń ajyrasýynyń bir sebebi. Bul týraly Qazaqstan reprodýktıvti medıtsına qaýymdastyǵynyń prezıdenti, akademık Vıacheslav Lokshın Asfendııarov atyndaǵy QazUMÝ-da medıtsınalyq jýrnalıstıka kýrsynda sóılegen sózinde aıtty, dep habarlaıdy QazAqparat tilshisi.
Onyń aıtýynsha, Qazaqstanda bedeýliktiń jıiligi shamamen 15%-dy quraıdy.
«Jyl saıyn mamandarǵa 20,5 myńǵa jýyq jup júginedi, olardyń 40-45%-y kómekshi reprodýktıvti tehnologııa júrgizýdi qajet etedi. Búgingi tańda 100 erli-zaıyptynyń 34-i ajyrasqan. Ajyrasý jaǵdaılarynyń 10% sebebi – balalardyń bolmaýy», - dedi Vıacheslav Lokshın.
Reprodýktolog atap ótkendeı, bedeýlik - eki adamnyń problemasy, ony birlesip sheshý qajet.
«Men aıtyp ótkendeı, otbasynda balalardyń joqtyǵy áıelderdi ǵana alańdatpaıdy. EKU-ǵa kelgenderdiń 50% - er adamdar. Eger erli-zaıyptylar balaly bola almasa, olar EKU-ǵa júginedi. Tekserý kezinde negizgi faktorlar belgili bolady. Emdeýdiń barlyq protsesi - ýaqytty, kúsh-jigerdi jáne jaqsylyqqa degen senimdi qajet etetin jol. Sondyqtan munda naýqastardyń psıhologııalyq jaǵdaıy belgili ról atqarady», - dep atap ótti spıker.
Vıacheslav Lokshınniń aıtýynsha, elde balaly bolýǵa yntalandyratyn otbasylyq saıasat bolýy kerek.
«Basqa eldermen salystyrǵanda bizde bala týý boıynsha kórsetkishter oń. Bul – óte jaqsy kórsetkish», - dedi ol.
Eske sala keteıik, Prezıdent Úkimetke 2021 jyldan bastap «Ańsaǵan sábı» arnaıy baǵdarlamasyn iske qosýdy, sondaı-aq Memleket basshysy «EKU» baǵdarlamasy boıynsha kvota sanyn 7 myńǵa deıin, ıaǵnı 7 esege arttyrýdy tapsyrdy.
