Qazaqstandyq órt sóndirýshiler men qutqarýshylar qysqy maýsymǵa oraı jattyǵý jıynyn ótkizedi
ALMATY. 9 qarasha. QazAqparat - Búgingi tańda tótenshe jaǵdaılarda qyzmet etetin mamandardyń biliktiligi birshama joǵarylady.
Bul týraly keshe Almatyda óz jumysyn aıaqtaǵan órt sóndirýshiler men qutqarýshylardyń halyqaralyq sport federatsııasynyń XIV konferentsııasynda aıtyldy. «Qazaqstandyq órt sóndirýshiler men qutqarýshylar 3 aptadan keıin qysqy maýsymǵa daıyndyqtyń respýblıkalyq jattyǵý jıynyn ótkizedi. Qazirgi tańda órt sóndirýshiler men qutqarý qyzmeti kez kelgen tótenshe jaǵdaıda áreket etýge saqadaı-saı», - deıdi QR Tótenshe jaǵdaılar mınıstri Vladımır Bochko. Onyń aıtýynsha, tótenshe jaǵdaılarda qyzmet etý mekemeleriniń tehnıkalyq jaraqtanýy da qazirgi tańda jolǵa qoıylǵan. Endi órt sóndirý mekemelerin materıaldyq-tehnıkalyq jaraqtandyrý isine jergilikti atqarý organdary da qatysa alady. Máselen, bıyl órt sóndirýshiler úshin 100 tehnıka satyp alyndy.
