Qazaqstandyq orkestr Londonda zor qoshemetke bólendi
ASTANA. QazAqparat - Jambyl atyndaǵy Qazaq fılarmonııalyq kameralyq orkestri Ulybrıtanııa men Irlandııa qalalaryndaǵy bir aptalyq týrnesin Dýblın, Manchester jáne Londondaǵy kontsertterimen aıaqtady, dep habarlaıdy QazAqparat SІM baspasóz qyzmetine silteme jasap.
Qazaqstannyń Ulybrıtanııadaǵy Elshisi Erlan Ydyrysov qazaqstandyq mádenıetti shetelde tanytý isine qosqan úlesi úshin orkestr múshelerine alǵysyn bildirdi. Manchesterdegi kontsertte qazaqstandyq dıplomat elimizdiń Ulybrıtanııadaǵy ıadrolyq qarýdan azat aımaq bolyp jarııalanǵan alǵashqy qalamen erekshe qarym-qatynasyn atap ótti. Manchester men qazaqstandyq Semeı ıadrolyq qarýdan azat álemge qol jetkizýge baǵyttalǵan «Mayors for Peace» uıymy aıasynda birge jumys isteıdi.
Klassıkalyq mýzykany baǵalaı biletin meımandar, onyń ishinde ańyzǵa aınalǵan qazaq kompozıtorlarynyń týyndylaryn birinshi ret tyńdaǵandar qazaqstandyq mýzykanttar men klassıkalyq qazaq shyǵarmalarynyń erekshe dybysyn baǵalady. Kontsertterge qatysqan brıtandyq saıası, ekonomıkalyq jáne mádenı ortalardyń joǵary ókilderi jáne dıplomatııalyq korpýstyń músheleri klassıkalyq qazaq mýzykasyna jáne orkestrdiń shyǵarmashylyǵyna shynaıy qyzyǵýshylyq tanytty.
Londondaǵy kontsertke Ulybrıtanııa Premer-mınıstriniń Qazaqstandaǵy Saýda ókili Baronessa Emma Nıkolson, Lordtar palatasynyń múshesi, Qazaqstanmen yntymaqtastyq jónindegi kóppartııalyq top Tóraǵasynyń orynbasary Lord Mohamed Sheıh, jetekshi memleketterdiń elshileri, Ulybrıtanııa Syrtqy ister mınıstrliginiń, birqatar halyqaralyq uıymdardyń ókilderi jáne basqalar qatysty.
Tanymal kanadalyq skrıpkashy Lara Sent-Djon jáne qazaqstandyq klarnetıst Bekturǵan Jolaman týrneniń solısteri boldy. Orkestrge jetekshilik etken - ataqty qazaqstandyq dırıjer Erbolat Ahmedıarov.
Týrne barysynda orkestr «BBC Radio 3» radıosyndaǵy «In Tune» baǵdarlamasynyń tikeleı efırinde óner kórsetti. Atalǵan baǵdarlamaǵa dástúr boıynsha klassıkalyq, djaz jáne halyq mýzyka álemindegi úzdik orkestrler qatysady. Tyńdarmandar orkestrdiń jazbasyn «BBC» veb-saıtynda úsh aı boıy tyńdaı alady.
Londondaǵy kontsertten keıin orkestr Mılanǵa baryp, álemdik týrneniń qorytyndy kontsertin beredi.
Kontsertterdi Qazaqstan Respýblıkasynyń Mádenıet jáne sport mınıstrligi Ulybrıtanııadaǵy QR Elshiliginiń qoldaýymen «Jahandyq álemdegi zamanaýı qazaqstandyq mádenıet» jobasy aıasynda uıymdastyrdy. Týrne Qazaqstan men Ulybrıtanııa jáne Irlandııa arasyndaǵy dıplomatııalyq qatynastardyń 25 jyldyq mereıtoıyn atap ótti.
