Qazaqstandyq órender halyqaralyq olımpıadada 2 altyn, 3 kúmis medal enshiledi

NUR-SULTAN. QazAqparat – Matematıka, fızıka, hımııa jáne ınformatıka pánderi boıynsha Saha Respýblıkasynda (ıAkýtııa) ótken halyqaralyq «Týımaada» olımpıadasynan Qazaqstan qurama komandasy júldeli oraldy. Olımpıada qorytyndysy boıynsha bizdiń qurama komanda 2 altyn, 3 kúmis jáne 2 qola medalǵa ıe boldy, dep habarlaıdy QazAqparat Bilim jáne ǵylym mınıstrliginiń baspasóz qyzmetine silteme jasap.

Jeńimpazdar qatarynda Aıbek Myrzataev (Atyraý qalasy daryndy er balalarǵa arnalǵan «Bilim-ınnovatsııa» lıtseı-ınternaty) pen Raýan Qaldybaev (Nur-Sultan qalasy «Respýblıkalyq fızıka-matematıka mektebi») altyn medal jeńip alyp, jasóspirimder lıgasyndaǵy absolıýtti jeńimpaz atandy. Al, Arman Ýrazgýlov (Almaty qalasy Hodjıkov atyndaǵy №39 mamandandyrylǵan lıtseıi), Islamhan Serikbaev (Qyzylorda qalasy oblystyq daryndy balalarǵa arnalǵan №9 «Bilim-ınnovatsııa» lıtseı-ınternaty) jáne Dinmuhammed Tursynbaı (Almaty qalasy mamandandyrylǵan «Bilim-ınnovatsııa» lıtseı-ınternaty) kúmis medal ıelendi. Alekseı ıAnchenko (Almaty qalasy «Respýblıkalyq fızıka-matematıka mektebi») men Kıbrııanýr Abdýgafarova (Shymkent qalasy № 2 daryndy er balalarǵa arnalǵan «Bilim-ınnovatsııa» lıtseı-ınternaty) qola medaldi mise tutty.

Olımpıadada Reseı, Rýmynııa, Bolgarııa, Sıngapýr, Iran, Tájikstan jáne Qazaqstannan 154 oqýshy baq synady. Qazaqstannan olımpıadaǵa jalpy sany 17 oqýshy qatysty.

Olımpıada eki kún boıy jeke birinshilikte tórt pán boıynsha, atap aıtqanda matematıka, fızıka, hımııa jáne ınformatıka pánderinen eki týrda ótti.