Qazaqstandyq ónimder Reseıdiń sýpermarketterinde satyla bastady
ASTANA. QazAqparat - 10 qazaqstandyq óndirýshiniń taýarlary Reseı sýpermarketterinde satylymǵa tústi, dep habarlaıdy «KAZAKH INVEST» baspasóz qyzmeti.
«Elbasy tapsyrmasynyń 56.2 qadamy «Ult jospary - bes ınstıtýtsıonaldyq reformany júzege asyrýdyń 100 qadamyn» júzege asyrý aıasynda «KAZAKH INVEST» Ulttyq kompanııasy» AQ otandyq óndirýshilerdiń taýarlaryn Reseı Federatsııasynyń iri saýda oryndarynda saýdalaý jobasyn iske qosty. Reseı dúkenderiniń sórelerine otandyq ındýstrııanyń basynda turǵan 10 qazaqstandyq ónim óndirýshiniń taýarlary ornalastyryldy» - delingen habarlamada.
Bul jobany KAZAKH INVEST alǵash ret 2016 jyly iske qosqan. Ol kezde qazaqstandyq jetekshi kompanııalar Reseıdiń «Marııa-Ra» jáne «Kırovskıı» aımaqtyq saýda jelilerine 42 taýar túrin usynǵan bolatyn.
«Reseıdegi qazaqstandyq taýarlar aptalyǵy» aktsııasy Novosibir, Ekaterınbýrg, Barnaýl, Kemer, Tomsk jáne Novokýznetskte bir ýaqytta ótip, otandyq óndirýshilerdiń taýarlaryn 900-deı saýda oryndarynda tanystyrýǵa múmkindik týdy.
Byltyrǵy jyly Qytaı, Iran, Reseı syndy iri naryqtarǵa baǵyttalǵan 3 shatyrly brend quryldy. Olar: «Qazaq Organic Food», «KazMeat», «Halal Kazakhstan».
«Bıylǵy jyly otandyq taýarlardy Reseı naryǵynda satý múmkindigine ıe bolý úshin KAZAKH INVEST Tomsk, Arhangelsk, Severodvınsk jáne Novodvınskten taǵy da qosymsha kompanııalar tobynyń jelisin qosty. Belgili qazaqstandyq brendter Reseıdiń 1000-nan astam gıpermarketteri men dúkenderine usynyldy», - delingen habarlamada.
«Іri kólemdi «Reseıdegi Qazaqstan taýarlarynyń aptalyǵy» aktsııasy ekinshi jyl qatarynan memlekettiń qoldaýymen ótip otyr. Kóp jaǵdaıda biz aımaqtyq telearnalarda jarnamalar uıymdastyryp, qalalarda, saýda ortalyqtarynyń ishinde bılbordtar men plakattar ilip, aýdıorolıkter qosylady, qazaqstandyq ónimderdiń dámin tatýǵa arnalǵan kóptegen aktsııalar uıymdastyramyz. Osy jobanyń arqasynda reseılik tutynýshylar qazaqstandyq taýarlardyń sapasyn baǵalap úlgerdi. Aktsııa ótkizilgennen keıin saýda jelilerimen jetkizý kelisimsharttarynyń merzimi uzartylyp, qazaqstandyq taýar Reseı naryǵyn sátti jaýlaýda», - dedi «KAZAKH INVEST» Ulttyq kompanııasy» AQ basqarýshy dırektory Jálel Bolatov.
Joba aıasynda Reseıdiń saýda jelilerine 70-ke jýyq taýar túrleri usynyldy. Olardyń qatarynda, shyryndar, shyryndy sýsyndar, lımonadtar, un, makaron ónimderi, sháı, konfetter jáne shokoladtar, maıonezder, sondaı-aq áıel tazalyǵyna arnalǵan zattar bar.
