Qazaqstandyq ónim shyǵara alatyn sheteldik jastarǵa jaǵdaı jasalady - Úkimet basshysy
ASTANA. QazAqparat - Óz ıdeıasyn Qazaqstannyń ónimi retinde júzege asyra alatyn sheteldik jastarǵa elimizde barlyq jaǵdaı jasalmaq. Bul týraly búgin Astanada ótip jatqan Kazakhstan Global Investment Roundtable jahandyq ınvestıtsııalar jónindegi «dóńgelek ústel» barysynda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.
«Elimizdiń kóshi-qon saıasaty ózgerýde. Buryndary biz barynsha jabyq boldyq jáne talaptarymyz da qatań edi. Al búginde tehnologııalardyń ózgerip jatqanyn jáne sol joǵary tehnologııalarmen jumys isteı alatyn mamandardyń kerek ekenin túsinemiz. Qysqa ǵana ýaqyttyń ishinde ózińniń kadrlaryńdy daıyndap shyǵarý da óte qıyn. Belgili bir ýaqyt qajet. Sondyqtan da búginde bizge biliktiligi joǵary mamandar qajet ekendigin aıtýdamyz. Olar úshin bizdiń esigimiz ashyq. Qazirgi ýaqytta búkil álemde talanttar úshin talas júrip jatyr. Al dál sol kezde esigimizdi jaýyp alyp otyrsaq, bul da durys bolmaıdy», - dedi Úkimet basshysy.
Onyń aıtýynsha, Qazaqstan biliktiligi joǵary kadrlardy qabyldaýǵa jáne ınvestorlarmen birge jergilikti qyzmetkerlerdi qosa alǵanda mamandar daıyndaýǵa ázir.
«Biz Halyqaralyq IT Startup Hub qurylǵanyn jarııa ettik. Ol da «Astana» halyqaralyq qarjy ortalyǵy sııaqty burynǵy EKSPO aýmaǵynda ornalasatyn bolady. Ony taıaý arada iske qosamyz jáne talaby zor jastar elimizge kelýi úshin barlyq jaǵdaı jasaımyz. Granttar, jumys oryndary men baspana usynatyn bolamyz. Eń bastysy olar óz ıdeıalarymen elimizge kelip, sol ıdeıalaryn qazaqstandyq ónim retinde júzege asyrýy tıis», - dedi Baqytjan Saǵyntaev.
