Qazaqstandyq ónerpazdar áıgili «Frındj» festıvaliniń arnaıy júldesin jeńip aldy
ASTANA. QazAqparat - Qazaqstandyq ónerpazdar Edınbýrgte álemge áıgili «Frındj» festıvaliniń arnaıy júldesin jeńip aldy. Talǵamy joǵary kári qurlyq kórermenderin tańdaı qaqtyrǵan Anatolıı Ogaı men Tatıana Kım «Innovatsııa» atalymy boıynsha marapattaldy, dep jazady «Habar 24».
«Ózenniń arǵy betinde» monodramasyn jazǵan kalıfornııalyq óner ınstıtýtynyń túlegi - Anatolıı Ogaı. Qoıylymdaǵy bas jáne jalǵyz róldi de avtordyń ózi somdaıdy. Spektaklde 1937 jyly Qıyr Shyǵys shekarasy aımaǵynan Qazaqstan jáne Ortalyq Azııaǵa erkinen tys kóshirilip, ekinshi dúnıejúzilik soǵysqa qatysqan koreı ultynyń ókili týraly baıandalady.
«2012 jyly týǵan atamnan alǵan suhbat negizinde jasalǵan dúnıe. Spektaklde onyń surapyl 1943 jyly bastan keshken oqıǵalary beınelengen», - deıdi avtor jáne róldi solo-oryndaýshy Anatolıı Ogaı.
Joba avtorlarynyń aıtýynsha, kórermender Qazaqstannyń qıyn tarıhı kezeńderi týraly maǵlumat alyp, beıbitshilik mekenine aınalǵan búgini týraly bilgisi kelgen.
«Qoıylymda biz osyny kórsetýge tyrystyq. Óıtkeni ol shyndyq. Bizde dastarqan basynda 10 adam otyryp, olardyń árqaısysy ár túrli ult ókili bolýy múmkin. Sosyn biz barlyǵymyz bir tilde sóıleımiz. Sondyqtan da sheteldikter úshin bul tań qalarlyq jaǵdaı», - deıdi rejısser Tatıana Kım.
Tatıana men Anatolıı - erli-zaıyptylar. Olar Amerıka Qurama Shtattarynda jumys istep, ómir súredi. Al halyqaralyq festıvalderde Qazaqstannyń atynan shyǵyp, uly dala eliniń atyn pash etip júr.
