Qazaqstandyq óner juldyzdary jańa jyl merekesimen quttyqtady
Ánshi Dımash Qudaıbergen jerlesteri men tyńdarmandaryn jańa jyl merekesimen quttyqtap, shyn júrekten alǵys aıtty.
«Qurmetti dostar, sizderdi shyn júregimmen jańa jyl merekesimen quttyqtaýǵa ruqsat etińizder! Elimiz aman, jurtymyz tynysh bolǵaı! Álem halqy aman bolsyn! Araılap atqan árbir tańymyz bizge yrys-nesibesimen, berekesimen kelsin! Álemde eshbir sábı jylamaı, eshbir adam aýyrmasyn! Basty maqsatymyz, basty armandarymyz oryndala bersin. Alǵa qoıǵan maqsattarymyz aıqyndalyp, bolashaqqa kemel qadammen nyq basyp, jańa belesterdi baǵyndyra bereıik. Aman bolyńyzdar, bar bolyńyzdar! Jańa jyldaryńyz qutty bolsyn! Barlyq álemdegi tyńdarmandaryma, jerlesterime shyn júrekten rahmetimdi aıta otyryp, taǵy bir márte quttyqtaımyn!», - dedi Dımash Qudaıbergen Instagram paraqshasyna.
Ánshi Meırambek Besbaev da taǵy bir jyl zý etip óte shyqqanyn jazdy.
«Taǵy bir jyl zymyrap óte shyqty. Keler jyl barshamyzǵa jaıly, qutty jyl bolsyn!», - dep jazdy ol Instagram paraqshasyna.
Ánshi Sáken Maıǵazıev Instagram paraqshasyna 2020 jyl Táńir qaharlansa tórtkúl dúnıeni tarynyń qaýyzyna syıdyratynyn kórsetip, táýbemizge keltirgenin jazdy.
«Qıyndyqtar artta qalsyn, ardaqtylarym. Ár kálláda bir qııal. Árbir jumyrbasty pendeniń bir kem dúnıesi bar. 2020 jyly qanshama asyl adamnan aıyryldyq. Barsha marqumnyń jany jánnatta shalqysyn. Endi qaıǵy-qasiret kórmeıik qurmettilerim. Alla taǵala jastardyń tóte óliminen saqtaǵaı.
2021 jyly qajylyqqa, izgilikke, berekege, merekege, tabysqa toly jyl bolǵaı. Keler jyly boıdaqtar adal jar taýyp, árbir qazaq baspanaly bolyp, beıbit elde baıandy ǵumyr kesheıik!», - dedi ánshi.
Qaraqat Ábildına qazaqstandyqtardy jańa jyldarymen quttyqtady.
«Sanaýly saǵattardan soń qosh aıtqaly turǵan 2020 jyldy esh renish-ókpesiz, «kórsetkenińe shúkir» dep qana shyǵaryp salmaqpyz. Tap osy jyly ómirimnen jaqynym ketip, eń jaqynym ómirge keldi. Bári úshin rızamyn....
Dál osy jyly óz ómirimizge úńilip, jan-jaǵymyzǵa qarap, óz ishki únimizdi tyńdap, jat bolǵan jaqynyńdy tanıtyn jyl bolǵandaı. Ózime solaı bilindi. Gastrolden gastrol, kontsertten konýert, bir ushaqtan túse salyp, bir ushaqpen ushyp kete baratyn men – otbasy, oshaq qasyndaǵy, bes balany baǵyp, altynshysyn taýyp, as-aýqatyn ázirlep, kir-qońyn jýyp otyratyn naǵyz aıaýly, qamqor anaǵa aınaldym...
Qurmetti qazaq edi! Kele jatqan jańa jyl bárimiz úshin qaıyrly, berekeli, nesibeli jyl bolsynshy. Basymyz aman, denimiz saý, tórt kózimiz túgel, tórt qubylamyz teń, sondaı bir jaqsy jyl bolsyn!», - dep jazdy Qaraqat Ábildına Instagram parashasyna.
