Qazaqstandyq óndiriste iskerlik belsendilik artty - Ulttyq bank

ASTANA. QazAqparat - Qazaqstan qarjy naryǵynda iskerlik belsendilik ındeksi dınamıkasynyń birshama jaqsarǵany baıqalady, alaıda, ındeks burynǵysynsha teris aımaqta tur. Bul týraly Ulttyq bank aqsha-kredıt saıasaty departamentiniń dırektory Rústem Orazalın aıtty, dep habarlaıdy QazAqparat.

Mamannyń málimetinshe, logıstıkadaǵy problemalar men jetkizý isindegi kidirister – iskerlik belsendilikti tejeıtin negizgi sebepterdiń biri. Іskerlik belsendilik ındeksi jeltoqsanda 49,2 boldy.

«Jańa tapsyrystar men jańa ónim kólemi ulǵaıýy esebinen óndiriste iskerlik belsendilik artty. Munda ındeks 50,4-ke deıin kóterildi (qarashada – 49,0). Qalǵan sektorlarda ındeks 50 shamasynan tómen qalyptasty. Bul rette qurylysta kórsetkishtiń 46,9-ǵa deıin birshama jaqsarǵany baıqalady (qarashada – 45,1). Qyzmet kórsetý sektorynda kórsetkish 49,4 (qarashada – 49,3) kúıinde qalyp, asa ózgeris baıqalmady. Taý-ken ónerkásibinde jańa ónim kólemi, jumyspen qamtý deńgeıiniń tómendeýi jáne jetkizý merziminiń ulǵaıýy esebinen iskerlik belsendilik 47,3-ke deıin tómendedi (qarashada – 48,7)», - dep túsindirdi Ulttyq bank ókili.

2022 jylǵy jeltoqsanda kásiporyndardyń bıznes júrgizýdiń bolashaq jaǵdaılaryna qatysty kútýleri nasharlaǵanymen, jalpy oń pozıtsııada boldy. Kásiporyndar búgingi bıznes jaǵdaılardy áli de teris baǵalap otyr. Sóıtip, búgingi jáne bolashaq bıznes jaǵdaılardyń ortasha baǵasyn bildiretin bıznes-ahýal ındeksi 2,6-ǵa deıin tómendedi. Alaıda, bıznes-tsıkl «saǵatynyń» ındıkatory ósý aımaǵynda qaldy.

Kásiporyndar kommýnıkatsııalarǵa qoljetimdilik pen daıyn ónimge degen suranysty oń baǵalady. Bıznes jaǵdaılarynyń qalǵan faktorlarynda (salyq júktemesi, qarjyǵa/kredıtke qoljetimdilik, bıznesti qorǵaý máseleleri) teris baǵa basym.