Qazaqstandyq olımpıadashylardyń qorjynynda qazir 92 joldama bar
ALMATY. 21 mamyr. QazAqparat - Qazaqstandyq sportshylar Londondaǵy HHH Jazǵy olımpıada oıyndaryna qazirgi tańda 92 joldama jeńip aldy.
Onyń eń sońǵysyn Qytaıdyń Tsınhýandao qalasynda ótken Álem chempıonatynyń áıelder boksynan Saıda Hasenova jeńip alǵan bolatyn.
«Dınamolyqtar alǵa qoıǵan maqsatqa jetip, jospardy oryndady deýge bolady. Óıtkeni qazirgi ýaqytqa deıin 59 sportshymyzda eki aıdan keıin kúlli álem halqy nazaryn salatyn Olımpıada oıyndaryna joldama bar. Jalpy aýyr atletterimiz ben basqa da sport túrlerinen óner kórsetetin sportshylarymyzdan zor úmit kútemiz. Sonymen qatar bıylǵy Olımpıada oıyndaryna qatysatyn sportshylarymyz pármendiligi jaǵynan ótken oıyndarǵa qatysýshylarǵa qaraǵanda anaǵurlym joǵary», - deıdi «Dınamo» dene shynyqtyrý sport qoǵamy Sport basqarmasynyń bastyǵy Nıkolaı Knıazev.
2008 jyly Qytaıdyń Beıjiń qalasynda ótken HHІH Jazǵy olımpıada oıyndaryna sporttyń 14 túrinen synǵa 63 dınamolyq qatysqan edi. Olar 2 altyn, 4 kúmis jáne 5 qola medal utyp aldy. Bulardyń ishinde aýyr atletıkadan QR UQK BD aǵa leıtenanty Ilıa Ilın men boksshy QR ІІM ІÁ leıtenanty Bahyt Sársekbaev (boks) Olımpıada chempıony atandy. Al aýyr atletıkadan Anna Vajenına men Irına Nekrasova, erkin kúresten Taımýraz Tıgıev, dzıýdodan Ashat Jitkeev kúmis júldeniń ıesi boldy. Sondaı-aq grek-rım kúresini sheberleri Nurbaqyt Teńizbaev pen Áset Mambetov, erkin kúresshi Marıd Mýtalımov, taekvondoshy Arman Shylmanov jáne aýyr atlet Marııa Grabovetskaıa Olımpıadanyń qola júldesin enshilegen edi.
