Qazaqstandyq olımpıadashylardyń keńes zamanyndaǵy jetistikteri
ALMATY. QazAqparat - Qazaqstandyq sportshylar 1952-1980, 1988 jyldary KSRO quramynda, 1992 jyly TMD elderi quramynda, al 1996 jyldan bastap, Qazaqstan Respýblıkasy quramynda Olımpıada oıyndaryna qatysty.
Bıyl Brazılııanyń Rıo-de-Janeıro qalasynda ótetin XXXI jazǵy Olımpıada oıyndaryna 100-den astam sportshymyz qatysady.
Salystyryp qaraıtyn bolsaq, 1972 jyly Mıýnhen qalasynda ótken XX jazǵy Olımpıada oıyndaryna Qazaq KSR atynan - 6 sportshy, tórt jyldan keıin Monreal Olımpıadasyna - 11 sportshy, al 1980 jyly Máskeý Olımpıadasynda KSRO quramasy sapynda - 20 otandasymyz qatysyp, el namysyn qorǵady.
QR Prezıdenti Muraǵatynda qazaqstandyq sportshylardyń Olımpıada oıyndaryna qatysýy jóninde tarıhı qujattar saqtalǵan.
«Árıne, qazaqstandyq sportshylardyń Máskeýde ótken XXII jazǵy Olımpıada oıyndarynda kórsetken óneri, jetken jetistikteri erekshe este qaldy. Dúbirli dodada otandyq sportshylar respýblıkada sport deńgeıiniń joǵary dárejede ekendigin kórsetti.
Bul týraly KSRO mınıstrler keńesi janyndaǵy Dene shynyqtyrý jáne sport komıtetiniń Qazaq KSR basshylyǵyna joldaǵan hatynda jazylǵan. Taǵy bir muraǵattyq qujat - Máskeý Olımpıadasyna qatysýshylar týraly anyqtamada medaldar sany boıynsha derekter keltirilgen: «Buǵan deıingi Monreal Olımpıadasyna 11 qazaqstandyq óner kórsetti. Olardyń ishinde 6 sportshy marapatqa ıe boldy», - delingen QR Prezıdenti Muraǵatynyń habarlamasynda.
Budan ári, anyqtamada Máskeý Olımpıadasynyń júldegerleri men olardyń bapkerleri týraly derekter keltirilgen. Barlyǵy 16 qazaqstandyq sportshy ár túrli dárejede júldeger atandy.
Keńes sportshylary barlyǵy Máskeý Olımpıadasynda 80 altyn medaldi jeńip aldy. Olardyń ishinde 6 altyn medal qazaqstandyq sportshylarǵa tıesili. Olardyń esimderi: Jaqsylyq Úshkempirov (grek-rım kúresi, 48 keli) jáne Shámil Serikov (grek-rım kúresi, 57 keli), Vıktor Mazın (aýyr atletıka, 60 keli), Sergeı Kotenko (sý doby), Nadejda Olhova (basketbol) jáne Vladımır Mýravev (jeńil atletıka, estafeta 4*100 metr).
Sonymen qatar, Anatolıı Bykov (grek-rım kúresi, 74 keli), Vıktor Demıanenko (boks, 60 keli) jáne Serik Qonaqbaev (boks, 63,5 keli) Máskeý Olımpıadasynda kúmis medaldi ıelense, kógaldaǵy hokkeıden KSRO quramasynyń músheleri Mınneýla Azızov, Aleksandr Goncharov, Oleg Zagorodnev, Frıd Zıgangırov, Aleksandr Mıasnıkov jáne Mıhaıl Nıchepýrenko, sondaı-aq, jeńil atletıka boıynsha Tatıana Lesovaıa (dısk laqtyrýshy, olımpıadalyq nátıje: 67,4 metr) qola medalge qol jetkizdi.
QR Prezıdenti Arhıviniń dırektory, tehnıka ǵylymdarynyń doktory Borıs Japarovtyń aıtýynsha, Máskeý Olımpıadasyna qatysqan 20 qazaqstandyq sportshynyń 16-sy júldeger atandy. Bul keńestik respýblıkalar arasynda eń joǵary kórsetkishterdiń biri. Barlyǵy Máskeý Olıpıadasynda sporttyń 21 túri boıynsha oıyndar ótti. Al qazaqstandyq sportshylar 10 sport túri boıynsha óner kórsetti.
